عالىمدار قاتەرلى ىسىككە قارسى ءدارى ويلاپ تاپتى
ولار ءدارىنىڭ وزەگىن Porіfera نەمەسە Spongіa دەپ اتالاتىن كوپجاسۋشالى تەڭىز گۋبكالارىنان العان.
ونىڭ قۇرامىندا بار ەريبۋلين ادام ولىمىنە سەبەپكەر بولىپ جاتاتىن مەتاستازالاردىڭ تارالۋىن تەجەيتىن كورىنەدى. ليۆەرپۋلدە وتكەن قاتەرلى ىسىكتى زەرتتەۋ ۇلتتىق ينستيتۋتىنىڭ كونفەرەنسياسى بارىسىندا عالىمدار وبىرمەن كۇرەس سالاسىندا جۇرگىزگەن زەرتتەۋلەرىنىڭ ناتيجەسىمەن تانىستىردى. ولار اسقىنعان قاتەرلى ىسىكپەن كۇرەسۋگە شاماسى جەتەتىن جاڭا ەريبۋلين پرەپاراتىن سينتەزدەپ شىعارعان، دەپ جازادى MNT باسىلىمى.
زەرتتەۋ توبىن ليدس ۋنيۆەرسيتەتىنىڭ پروفەسسورى كريس تۆەلۆسوم باسقاردى. جاڭا ءدارىنىڭ ىسىك پەن مەتاستازاعا اسەرىن تەكسەرۋ ءۇشىن جۇرگىزىلگەن زەرتتەۋگە دەرتى اسقىنعان 1800 دەن اسا ايەل قاتىسقان. پرەپارات وبىر جاسۋشالارىنىڭ ەكىگە ءبولىنۋىن توقتاتىپ، سول ارقىلى قاتەرلى دەرتتىڭ باسقا اعزالارعا تارالۋىنىڭ الدىن الدى. ازىرگە پرەپارات دەرتتى تولىق جەڭبەسە دە، ناۋقاستاردىڭ ءومىرىن ۇزارتۋعا ۇلكەن مۇمكىندىك بەرىپ وتىر - وسىنىڭ ءوزى اۋرۋدان تولىق ايىقتىراتىن ءدارى ويلاپ تابۋدا جاسالىپ وتىرعان ۇلكەن قادام دەپ سانايدى دارىگەرلەر.
وسى ءدارىنى قابىلداعان ايەلدەردىڭ ءومىرى ورتا ەسەپپەن ەكى ايعا ارتىپ وتىرعان. بويىنان زالالدى قاتەرلى ىسىك انىقتالعان ايەلدەردىڭ كەيبىرى ءدارىنىڭ ارقاسىندا بەس ايعا ارتىق ءومىر ءسۇرىپتى. دارىگەرلەر وسى قوسىمشا ۋاقىتتى ءداستۇرلى ادىسپەن ەم جۇرگىزۋگە پايدالانۋعا بولادى دەپ وتىر. سەبەبى دەرتتى جەڭۋدە كوپ جاعدايدا ۋاقىت تاپشىلىعى كەدەرگى بولىپ جاتادى دەگەن پىكىرىمەن ءبولىستى ۇلى بريتانياداعى قاتەرلى ىسىكتى زەرتتەۋ اقپاراتتىق ورتالىعىنىڭ باسشىسى مارتين لەدۆيك.
«بۇل ناتيجەلەر قاتەرلى ىسىگى ءداستۇرلى ەمدەۋ ادىسىنە دەس بەرمەي، از ۋاقىتى قالعان ناۋقاستار ءۇشىن ءۇمىت سىيلاپ، قوسىمشا ۋاقىت ۇتۋعا مۇمكىندىك بەرەدى. ءسۇت بەزىنىڭ زالالدى قاتەرلى ىسىگىن ەمدەۋ وتە قيىن. سوندىقتان بۇل زەرتتەۋ وسى ماسەلەنى جەڭۋدە ۇلكەن مۇمكىندىك بەرەدى» ، - دەپ قوستى ول.
سوڭعى جۇرگىزىلگەن زەرتتەۋلەر ناتيجەسى وبىرعا شالدىققان ادامدار ءولىمىنىڭ 90 پايىزى مەتاستازالاردىڭ تەز تارالىپ، وزگە اعزالارعا شاۋىپ كەتۋىنەن بولاتىنىن كورسەتتى. ەگەر دەرت مەتاستازالار تاراپ كەتكەننەن كەيىن عانا انىقتالسا، كەيىنگى ون جىلدا امان قالۋ مۇمكىندىگىنە كەپىل جوق.
Bnews.kz
