قازاقستاندىق عالىمدار كومىردەن سينتەتيكالىق مۇناي وندىرۋگە دايىن

ءال-فارابي اتىنداعى قازاق ۇلتتىق مەملەكەتتىك ۋنيۆەرسيتەتى، جاڭا حيميالىق ماتەريالداردى تالداۋ عىلىمي زەرتتەۋ ينستيتۋتىنىڭ ديرەكتورى سەرگەي كالۋگيننىڭ ايتۋىنشا، وتاندىق جوبا قارجىلاندىرۋعا تولىق دايىن.

كالۋگيننىڭ ايتۋىنا قاراعاندا، بۇل جوبا ءبىلىم جانە عىلىم مينيسترلىگىنىڭ، سونداي-اق، «پاراسات» ۇلتتىق عىلىمي حولدينگىنىڭ قولداۋىمەن زەرتتەلىپ وتىر. عالىمدار ءوز تەحنولوگيالارىنىڭ جوباسىن جاساۋ ءۇشىن ارنايى گرانت العان.

ينستيتۋت ديرەكتورىنىڭ مالىمەتىنشە، ساراپشى ماماندار سينتەتيكالىق مۇناي الۋدى اقتوبە وبلىسىنىڭ بيلىگىمەن بىرلەسىپ جۇزەگە اسىرۋدى ۇسىنىپ وتىر. كالۋگين «اتالمىش وبلىستا سينتەتيكالىق مۇناي الۋعا بولاتىن بىرنەشە كومىر كەنى بار. الايدا ەكى جاق ءالى ناقتى كەلىسىمگە كەلگەن جوق»، - دەيدى.

بۇعان قوسا ساراپشى مامان سينتەتيكالىق مۇناي نەگىزگى مۇناي كوزىن الماستىرا المايتىنىن دا العا تارتۋدا. دەگەنمەن، بۇل مۇناي ارزان باعالانبايدى. قازىر قازاقستانداعى مۇناي ونىمدەرىنىڭ تاپشىلىعىنا قاتىستى بۇل باعىتتا جۇمىس ىستەۋ قاجەتتىلىك بولىپ وتىر.

«ءبىز بولاشاق ءۇشىن جۇمىس ىستەيمىز. سوندىقتان كومىردەن سينەتيكالىق مۇناي الۋدى جالعاستىرامىز»، - دەيدى كالۋگين.

بۇدان بۇرىن ەنەرگەتيكا ءمينيسترى ۆلاديمير شكولنيك قازاقستاندا كومىردەن سينتەتيكالىق مۇناي الۋ جوباسى بويىنشا جۇمىس جاسالىپ جاتقانىن مالىمدەگەن بولاتىن. ول ەلدەگى كومىر قورى شامامەن 300 ميلليارد توننانى قۇرايتىنىن ايتا كەلە، بۇل جوبا مۇناي-گاز كومپانيالارىنىڭ باسەكەگە قابىلەتتىلىگىن ارتتىراتىنىن العا تارتتى. شكولنيكتىڭ مالىمدەۋىنشە، سينتەتيكالىق مۇناي ءوندىرۋ ەلدە شيكىزات كوزىن مولايتىپ، قاشاعانمەن سالىستىراتىن مۇناي قورىن جاساقتاۋعا مۇمكىندىك بەرەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى