قازاقتىڭ كۇيى ماڭگى جاسايدى - ت. الىپبايەۆ
كەشتى ايگىلى قۇرمانعازىنىڭ «قايران شەشەم» كۇيىن كۇمبىرلەتۋمەن باستاعان ول ۇلىق ونەرىمىز حاقىندا قاستەرلى سىر اعىتىپ، سان مىڭ جىلعى تاريحىمىزدى جادىندا ساقتاۋشى دومبىرانىڭ قۇدىرەتى جايىندا ساناعا ساۋلە سەبەر ءسوز ساپتادى.
شىركىن، ادامزات مادەنيەتىنە ۇلەس قوسقان الىپتارىمىز قانداي! ءتاۋ ەتەر تاۋەلسىزدىگىمىزبەن بىرگە شوقتىعى بيىكتەي تۇسكەن سول سايىپقىراندارىمىزدىڭ اسىل بەينەسىن جاڭعىرتتى كۇيشى. ءوزى ورىنداعان ءار شىعارمانىڭ تاريحىن بايانداۋىنان-اق قازاقتىڭ ونەرىن سوناۋ جاپونيا، البانيا، بەلگيا، قىتاي، تۇركيا، فرانسيا، باسقا دا ەلدەرگە تانىتقان ازاماتتىڭ سۇڭعىلالىعىن بىردەن-اق سەزەسىڭ.
قۇرمانعازى مەكتەبىنىڭ اسا دارىندى وكىلى دينانىڭ تۋىندىلارى دا شابىتتى ورىندالدى. ونىڭ زاعيپ ءانشى قىزعا ارناعان «بۇلبۇلى»، تاشكەنتتەگى بۇكىل وداقتىق فەستيۆالدا وعان ءبىرىنشى ورىن اكەلگەن «ناۋايى» دا كوكىرەك كوزىڭدى اشىپ، ونەردىڭ كيەسىنەن لەپ اكەلدى. ەندى ءبىر مەزەت قاعىسىندا قاپىسى جوق اتانعان، بۇلاقتىڭ سىلدىرىنان ساز شىعارعان قازانعاپتىڭ كۇيلەرى كۇمبىرلەدى جۇرەگىڭدى ەلجىرەتىپ. وزگەگە ۇقسامايتىن سارا جولى، تارماقتى كۇيلەردى دامىتۋعا زور ۇلەس قوسقان ق. تىلەپبەرگەن ۇلىنىڭ «بالجان كەلىنشەگى» سۇيىكتىسىنە دەگەن اسقاق سەزىمنىڭ ءمولدىر مۇناراسىنداي بولسا، «بوگەلەك قاقپايى» سايىن دالامىزدىڭ قۇتى مەن سۇلۋلىعىن ءسوزسىز كوز الدىڭا اكەلەدى.
جانارىڭدى جاۋلاپ، جۇرەگىڭدى ەلجىرەتكەن قارا دومبىرانىڭ شاناعىنان «اققۋ» سۇڭقىلدادى قاناتتارىن سۋىلداتىپ. قازاقتىڭ باعىنا بىتكەن نۇرعيساسىنىڭ دۇنيەجۇزىلىك كلاسسيكالىق مادەنيەتكە قوسقان قولتاڭباسىنىڭ ءبىرى عوي بۇل.
كەش بارىسىندا «سويلەپ، سويلەپ ءبىر كەتكەندە، قىزىل تىلدەن ماي شىعار...» دەپ سارتايدىڭ تەرمەسىن اۋەلەتكەن جەرگىلىكتى ونەرپاز، «قوبىلاندى باتىر» مەدالىنىڭ يەگەرى سۇڭعات جانايەۆ، بالالاردىڭ بي توبى بۇل جارقىن جۇزدەسۋدى ايشىقتاي ءتۇستى.
كەش سوڭىندا ت. الىپبايەۆقا اۋدان اكىمى ناريمان تورەعاليەۆتىڭ العىس حاتى تابىس ەتىلدى.
قازاق كۇي ونەرىن ناسيحاتتاۋدى ماقسات ەتكەن كۇيشىنىڭ ساپارى بۇدان كەيىن جاڭاقالا، بوكەي ورداسى، جانىبەك اۋداندارىندا جالعاستى.
اۆتور: ەلجان ەرالى
