شىمكەنتتە ءمارمار بۇيىمدار شىعادى

 وسى يننوۆاتسيالىق جوباسى ءۇشىن وعان «شىمكەنت يننوۆاتسيا» مەكەمەسى «بيزنەستىڭ جول كارتاسى-2020» باعدارلاماسى اياسىندا 6 ميلليون تەڭگە گرانت بەردى. مۇنىمەن قوسا، «شىمكەنت يننوۆاتسيا» ماماندارى ءتيىستى قۇجاتتاردى جيناۋعا جان- جاقتى كومەكتەسىپ، بيزنەس- جوسپار قۇرۋعا جاردەمدەستى, دەپ جازادى «وڭتۇستىك قازاقستان» گازەتى.

كاسىپكەر بۇل جۇمىسىنان بولەك نەمىستىڭ قۇرىلىس ماتەريالدارىن جەرگىلىكتى ساۋداگەرلەرگە جەتكىزىپ بەرۋمەن اينالىسادى. ياعني گەرماندىق ارىپتەستەرمەن ورناتقان ىسكەرلىك بايلانىس نەگىزىندە ديستريبيۋتەرلىك قىزمەت كورسەتەدى. وسى بيزنەستەن قۇرالعان قاراجاتقا سەرىكتەسىمەن بىرلەسىپ بىلتىر جوعارىدا ايتىلعان سەحتى اشتى. جىلدىڭ باسىندا ۇتىپ العان 6 ميلليون تەڭگە گرانتقا تۇركيادان ءمارمار قۇياتىن ارنايى قالىپتار ساتىپ الدى جانە شەتەلدەن وسى كاسىپتىڭ قىر- سىرىن بىلەتىن مامان جالداپ اكەلدى.

جالپى، كەز كەلگەن بيزنەستىڭ باستاۋىندا ءبىرىنشى كەزەكتە يدەيا تۇرادى. ال بۇل ءىستى قولعا الۋعا ەڭ العاش كەڭەس بەرگەن اتىراۋ قالاسىندا كەزىندە بىرگە قۇرىلىستا قىزمەت اتقارعان تۇركيالىق مامان بولىپتى. 

 - مۇنايلى ءوڭىردىڭ باس قالاسىندا قوناقۇيلەر سالاتىن قۇرىلىس كومپانياسىندا جۇمىس ىستەپ جۇرگەن كەزدە ءمارمار بۇيىمدارعا قىتايعا تاپسىرىس بەرەتىنبىز. ءبىراق ول جاقتان باعاسى قىمبات بولسا دا ساپاسى ناشار تاۋارلار كەلەتىن. كەيدە سىنعان بۇيىمداردىڭ اراسىنان اعاشتار شىعىپ، قىتايلىقتاردىڭ قۋلىعى كورىنىپ قالىپ جاتاتىن. ءبىر كەزدەرى ءتىپتى ءمارمار تاپپاي ساندالىپ، جامان قىتايلىق تاۋاردىڭ ءوزى قول جەتپەس دۇنيەگە اينالاتىن. سوندا قاسىمدا بىرگە جۇمىس ىستەيتىن تۇركيالىق مامان:

 «وسىنى وزدەرىڭ دە جاساساڭدار بولادى عوي» دەگەنىندە قاتتى ويلانىپ قالدىم. ءسويتىپ، عالامتور ارقىلى بۇل كاسىپتى 8 ايداي زەرتتەدىم. شيكىزاتتىڭ قازاقستاندا، كورشى جامبىل وبلىسىنىڭ قاراتاۋ قالاسىندا شىعارىلاتىنىن بىلگەن سوڭ، تاۋەكەلگە بەل بۋىپ ەلىمىزدە بۇرىن- سوڭدى قولعا الىنباعان جاڭا بيزنەسكە العاشقى بولىپ تۇرەن سالدىم، - دەيدى كاسىپكەر. 

 ءمارمار شيكىزاتىن كاسىپكەر ۇنتاق كۇيىندە ساتىپ الادى. ءبىر قابى شامامەن 3,5 مىڭ تەڭگە تۇرادى. سەحتا ءمارمار قۇيۋدىڭ نەگىزگى جانە ەڭ جاۋاپتى جۇمىسىن اتقاراتىن ۇستا - ەفيوپيا ەلىنەن كەلگەن تۇرىك مامانى. ونى «رەكرۋتينگ» فيرماسى ارقىلى عالامتوردى شارلاپ ارەڭ ىزدەپ تاپقان. دەگەنمەن، تۇرىك مامانى كەلىسىمشارتقا سايكەس، سەحتا جۇمىس ىستەيتىن قازاق بالالارىنا بار بىلگەنىن ۇيرەتىپ، وسى كاسىپكە باۋلىپ جاتىر. سەرىك مۇحتار ۇلىنىڭ ويىنشا، قازاقستانداعى ۋنيۆەرسيتەت، ارناۋلى وقۋ ورىندارىنىڭ بىردە بىرەۋىندە ءمارماردان بۇيىم جاساۋشى ماماندىقتار وقىتىلمايتىن كورىنەدى.   

 سەح قوندىرعىلارى سوڭعى ۇلگىدەگى تەحنيكالىق قۇرال- جابدىقتارمەن جاراقتالعان. وندا بۇگىنگى تاڭدا 5 ادام جۇمىس اتقارادى. بۇل كاسىپتىڭ ادام دەنساۋلىعىنا كەلتىرەر ءبىرشاما زياندىلىعى بولعاندىقتان شەبەرلەر سوعان لايىقتى جوعارى جالاقى الادى. مۇندا كۇنىنە 320 مىڭ تەڭگەنىڭ زاتى شىعارىلادى. باعاسى دا وتاندىق تاۋار بولعانى ءۇشىن شەتەلدىك ونىمنەن ەكى ەسەدەي ارزان. مىسالىعا، 70-80 مىڭ تەڭگە تۇراتىن يمپورتتىق بۇيىمنىڭ قاسىندا ءدال وسىنداي ساپادا شىعارىلعان وتاندىق ءونىمنىڭ باعاسى شامامەن 30 مىڭ تەڭگە بولادى. ونىمدەر نەگىزىنەن شىمكەنت قالاسىنداعى قوناقۇيلەرگە ساتىلۋدا. جەكە ادامدار تاراپىنان دا ساتىپ الىپ جاتقاندار كوپ. مۇنىمەن شەكتەلمەي، جۋىردا بىشكەك قالاسىنا دا تاۋار جونەلتىپتى. كاسىپكەر بيزنەسىن كەڭەيتۋ ماقساتىندا كەلەشەكتە قىزىلوردا قالاسىنان دا ءبىر سەح اشۋ نيەتى بار. ءسويتىپ، ءونىم ەكسپورتىن ۇلعايتۋدى جوسپارلاپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى