ەلباسى كىتاپحاناسىنىڭ العاشقى وقىرماندارى دەپۋتاتتار مەن جازۋشىلار بولادى
بۇل تۋرالى بۇگىن كىتاپحانا سايتىنىڭ تۇساۋكەسەر راسىمىندە كىتاپحانانىڭ باسپا ءسوز حاتشىسى وكسانا لوسكۋتوۆا ايتتى.
«قاراشانىڭ باسىندا ەلباسىنىڭ العاشقى وقىرماندارى بەلگىلى بولادى. ياعني، وقىرمان بيلەتتەرىن تاپسىرۋ شاراسى وتەدى. ولاردىڭ قاتارىندا سەنات، ءماجىلىس دەپۋتاتتارى، اتاقتى جازۋشىلار، عىلىم جولىنداعى ەل اعالارى بار»، - دەپ اتاپ ءوتتى ول كىتاپحانانىڭ ءبىر جىلدىق جۇمىس جوسپارىمەن تانىستىرۋ بارىسىندا.
سونداي- اق، باسپا ءسوز حاتشىسىنىڭ مالىمەتىنشە، قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ اتسالىسۋىمەن «ءبىلىم بەرۋ الاڭى «الەمدى وزگەرتەتىن ويلار» » اتتى دوڭگەلەك ۇستەل وتكىزۋ جوسپارلانعان.
«سونىمەن قاتار، كىتاپحانا قابىرعاسىندا «تۇڭعىش- ءبىرىنشى» دەرەكتى فيلمدەر اپتالىعى وتەدى. بۇل شارا بىلتىر پرەزيدەنت كۇنى قارساڭىندا العاش رەت ۇيىمداستىرىلعان بولاتىن. بيىلعى شارانىڭ وزندىك ەرەكشەلىگى بار، ياعني اپتالىقتىڭ اشىلۋىندا بەلگىلى فرانسۋز رەجيسسەرى رەجيس گەزەلباشتىڭ تۇڭعىش پرەزيدەنت، تاۋەلسىز قازاقستانىڭ تاريحى جانە ەلباسىنىڭ كىتاپحاناسى تۋرالى فيلمدەرى كورسەتىلەدى»، - دەدى و. لوسكۋتوۆا.
ونىڭ ايتۋىنشا، بيىلعى وقۋ جىلى قارساڭىندا «ءبىزدىڭ پرەزيدەنت» كىتابىنىڭ تۇساۋ كەسىلگەن بولاتىن. ەندى بۇل كىتاپ ەلدىڭ ايماقتارىنا، ناقتى ايتقاندا الماتى مەن ش ق و- نىڭ نازاربايەۆ زياتكەرلىك مەكتەپتەرىندە وقىپ جاتقان بالالارعا جول تارتادى. سونىمەن قاتار، جىل سوڭىندا مۇعالىمدەر مەن جاس عالىمدارعا ارنالعان «ءبىزدىڭ ەل - ءبىزدىڭ پرەزيدەنت» اتتى ترەنينگ- سەمينارلار وتكىزىلەدى. سونداي- اق، كىتاپحانادا اشىق ەسىك كۇنىن وتكىزۋ دە جوسپارلانعان. بۇل كۇنى ەلباسى كىتاپحاناسىنا وبلىستاردان دەلەگاتتار كەلەدى دەپ كۇتىلۋدە.
