گاچيك گريگوريان: قازاق حالقىنىڭ بىرلىگى ارقاسىندا ءتۇرلى ۇلت وكىلدەرى بۇگىنگى كۇنى تاتۋ-ءتاتتى ءومىر ءسۇرىپ وتىر - فوتو
گاچيك گريگورياننىڭ ايتۋىنشا، قازاقستانداعى ارميانداردىڭ تاريحى ۇلى قونىس اۋدارۋ مەن ساياسي قۋعىن- سۇرگىن كەزەڭىنەن باستاۋ الاتىن كورىنەدى. 1937 - جىلدىڭ باسىندا ارمياندار ارمەنيا مەن گرۋزيادان، ءازىربايجاننان جانە كەڭەس وداعىنىڭ باسقا دا وڭىرلەرىنەن كۇشتەپ قونىس اۋدارىلسا، ەكىنشى كەزەڭدە بەسجىلدىقتاردىڭ ماڭىزدى قۇرىلىستارىنا مامانداردى جاپپاي جۇمىلدىرۋ ناتيجەسىندە قازاقستانعا كوشە باستاعان.
«ال، مەنى قازاقتاردىڭ دارقاندىعى مەن جەرىنىڭ بايتاقتىعى وسى ەلگە تۇڭعىش رەت 1960 - جىلى 18 جاسىمدا ساياحاتتاپ كەلگەنىمدە بىردەن باۋراپ العان بولاتىن. بۇگىن كۇنى ارميان دياسپوراسى وكىلدەرىنىڭ قازاقستان حالقىنىڭ دوستىعىن نىعايتۋداعى ماڭىزى زور دەر ەدىم. ءوزىم جەتەكشىلىك ەتىپ وتىرعان «ارارات» ارميان ۇلتتىق- مادەني ورتالىعى قوعامدىق بىرلەستىگىنىڭ دە باستى ماقساتى ارميان حالقىنىڭ ۇلتتىق ەرەكشەلىكتەرى مەن داستۇرلەرىن، ونىڭ تاريحى مەن مادەنيەتىن ساقتاپ، بەيبىتشىلىكتى، ءتۇرلى ۇلت وكىلدەرىنىڭ اراسىنداعى دوستىقتى نىعايتۋ بولىپ تابىلادى.
قازاق حالقىنىڭ بەرەكە-بىرلىكتى قاستەرلەۋىنىڭ ارقاسىندا ءتۇرلى ۇلت وكىلدەرى قيىن-قىستاۋ كەزەڭدەردەن امان ءوتىپ، قازىر ءومىردىڭ قىزىعىنا بولەنۋدە دەسەم، ارتىق ايتپاسپىن. مىنە، سول دوستىق قارىم- قاتىناستار ءالى جالعاسىپ كەلەدى. مەن دە ءوز ۇلتىمنىڭ ءداستۇرىن ەلىمىزدە تۇرىپ جاتقان وزگە ەتنوستارعا تانىتۋ ارقىلى بىرلىگىمىزدى پاش ەتۋدى ازاماتتىق پارىزىم دەپ بىلەمىن»، دەيدى كەيىپكەرىمىز.
ەسكە سالا كەتسەك، قازىرگى تاڭدا جارقايىڭ اۋدانىندا ارميان ۇلتىنىڭ 100 دەن استام وكىلى تۇرىپ جاتىر. بىرلەستىكتىڭ وكىلدەرى اۋدانداعى ءتۇرلى مادەني ءىس-شارالارعا ات سالىسىپ، «ارارات» ءان-ءبي انسامبلىنىڭ مۇشەلەرى ونەر سايىستارىندا جۇلدەلى ورىنداردان كورىنىپ ءجۇر. اسىرەسە، «قازاقستان حالقى كۇنى» جانە «ناۋرىز مەيرامى» ءتارىزدى ءتۇرلى مەملەكەتتىك مەرەكەلەرگە اتسالىسۋ داستۇرگە اينالعان.
سونداي-اق، ەتنو-مادەني ورتالىقتا قاريالار كەڭەسى جانە جاستار بىرلەستىگى جۇمىس ىستەيدى. ولاردىڭ ءارقايسىسى قازاق ءتىلىن مەڭگەرۋگە زور قۇلشىنىس تانىتىپ وتىر.
اۆتور: اسلان وسپانوۆ
