رەسەيدىڭ كولومنا قالاسىنىڭ ماڭىنان قازاق مايدانگەرىنىڭ سۇيەگى تابىلدى - فوتو

كوپتەگەن جەرلەسىمىز شايقاس الاڭىنان ورالمادى. مايداندا قازا تاپقان نەمەسە ءىز-ءتۇسسىز جوعالعان جاۋىنگەرلەردىڭ وتباسى، تۋعان-تۋىستارىنىڭ كوبىسى ولاردىڭ تاعدىرىنان بەيحابار بولدى، قابىرىنە زيارات ەتۋ ولار ءۇشىن ءتىپتى ورىندالماس ارمان كورىنەتىن...

 ىزگىلىككە جانى قۇمار جاندار بار ەكەن، ولار ىزدەۋ جاساقتارىن قۇرىپ، بۇرىنعى شايقاس الاڭدارىندا قازبا جۇمىستارىن جۇرگىزىپ جاتىر.

15 جىل بويى وسى جولدا تىنباي تەر توگىپ كەلە جاتقان «سۋۆوروۆ» ىزدەۋ جاساعىنان ءبىزدىڭ جەرلەسىمىز تۋرالى حابار جەتتى. 2014 - جىلدىڭ قىركۇيەگىندە ىزدەۋ توبى كولومنا قالاسى ماڭىندا شىعىس قازاقستان وبلىسى زىريان اۋدانىنان شاقىرىلعان جاۋىنگەر، 1907 - جىلى تۋعان اسەت بايۋبايەۆتىڭ ءمايىتىن تاۋىپتى. ۇلى وتان سوعىسىنىڭ جاۋىنگەرى رەسەي جەرىندە لەنينگراد وبلىسىندا كومۋسىز قالعان ەكەن.

«سۋۆوروۆ» ىزدەۋ جاساعى» كولومنا قالالىق قوعامدىق ۇيىمىنىڭ ءتورايىمى ولگا ۆلاديميروۆنا سترۋجانوۆادان زىريان اۋدانى مۇراعاتىنا حات كەلدى، ول ىزدەۋ جۇمىستارى كەزىندە تابىلعان مالىمەتتەر مەن سۋرەتتەردى قوسا جىبەرىپتى.

«63 - گۆارديالىق اتقىشتار ديۆيزياسىنىڭ مەرگەنى اسەت بايۋبايەۆ 1943 - جىلدىڭ 24 - شىلدەسىندە اربۋزوۆو ەلدى مەكەنى ءۇشىن شايقاستاردىڭ بىرىندە قازا تاپقان. قورعانىس مينيسترلىگى ورتالىق مۇراعاتىنىڭ قۇجاتتارى بويىنشا ول لەنينگراد وبلىسى مگينسكي اۋدانى اربۋزوۆو اۋىلىنان 800 مەتر جەردە جەرلەنگەن. شىندىعىندا اسەت بايۋبايەۆ سوڭعى شابۋىل كەزىندە قازا تاۋىپ، ساز بالشىقتا قالىپ قويعان ەكەن. جاۋىنگەردەن حات سالىنعان ۆينتوۆكانىڭ توت باسقان گيلزاسى تابىلدى، وندا قازا تاپقان اسەت بايۋبايەۆ پەن ونىڭ ايەلى اننا لاۆرەنتيەۆنانىڭ اتى-ءجونى، تۇرعىلىقتى جەرى جازىلعان»، - دەلىنگەن حاتتا.

BNews.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى