ءۇرجاردا جاسالعان ونىمدەر قىتايدىڭ شاۋەشەك، شاعانتوعاي اۋداندارىندا ساۋدالانباق
دەلدالسىز ساۋدانى جولعا قويۋ ءۇشىن قىتايدا ءۇرجار اۋدانىنىڭ ونىمدەرىن ساتاتىن ساۋدا ۇيلەرى اشىلماق. بۇل تۋرالى تىكەلەي ەفير فورماتىندا وتكەن بريفينگتە ءۇرجار اۋدانىنىڭ اكىمى سەرىك زاينۋلدين مالىمدەدى، دەپ حابارلايدى BAQ. KZ ءتىلشىسى ش ق و اقپاراتتىق ورتالىعىنا سىلتەمە جاساپ.
بريفينگتە سونداي-اق، اۋدان بويىنشا ءبىرقاتار ماسەلەلەر قاۋزالدى. اۋىز سۋ مەن جول جاعدايىنا الاڭداعان اۋدان حالقىنىڭ ساۋالدارى بويىنشا س. زاينۋلدين ناقتى تاپسىرمالاردىڭ اتقارىلىپ جاتقانىن العا تارتتى. «ماقانشى اۋىلىنىڭ سۋ ماسەلەسىن شەشۋ ءۇشىن بيىل «اق بۇلاق» باعدارلاماسى بويىنشا اۋدان بيۋدجەتىنەن 15 ميلليون تەڭگە قاراجات ءبولىنىپ، جوبالىق-سمەتالىق قۇجاتتار دايىندالدى.
سونىمەن قاتار، ماقانشىدا بىلتىر 4 كوشە جوندەلدى. جول - كۇرەتامىر. دەسە دە، سۋ ماسەلەسىن ءبىرجاقتى ەتپەي، جول ماسەلەسى شەشىلمەيدى» ، - دەدى اۋدان اكىمى.
اۋداندا اتقارىلعان تاعى ءبىر يگى ىستەردىڭ ءبىرى - «الاكول تازالىق» مەكەمەسىنىڭ قۇرىلۋى. مەملەكەتتىك- كوممۋنالدىق مەكەمەنى قۇرۋ ءۇشىن وبلىستىق بيۋدجەتتەن 30 ميلليون، اۋدان بيۋدجەتىنەن 18 ميلليون تەڭگە بولىنگەن.
الاكولدە حالىققا قىزمەت كورسەتۋ ءۇشىن 32 مامان اباتتاندىرۋ جۇمىسىمەن اينالىسادى. قوقىس شىعاراتىن ارنايى تەحنيكالار قىزمەت اتقارادى. اتقارىلعان يگى ىستەردى سارالاعان س. زاينۋلدين الاكولگە بىلتىر دەمالۋعا 90 مىڭ ادام كەلسە، بيىل 123 مىڭ ادام كەلگەنىن ايتىپ ءوتتى.
ءۇرجارلىقتار سونىمەن بىرگە، 2013 -جىلى ىسكە قوسىلعان «جاسىل ءدالىز» جوباسى بويىنشا تابىستى ەڭبەك ەتۋدە. قىتاي كوكونىسى تاسىمالداناتىن «باقتى» وتكىزۋ پۋنكتى ارقىلى ءۇرجارلىقتار كورشى ەلگە ەكسپورتقا 600 ت. كۇنباعىس وتكىزگەن.
«اعىمداعى جىلى 22 - ناۋرىزدا شاۋەشەكتە جارمەڭكە وتكىزىپ، بالدىڭ كەلىسىن 1600-1800 تەڭگەدەن ساۋدالادىق. قىتاي ءبىزدىڭ ۇن، بيداي، زىعىر، سويا، ەت ونىمدەرىمىزگە ءزارۋ. سونداي-اق، شۇجىقتىڭ 60 ءتۇرىن وندىرەتىن اۋداندىق «شۆاب شۇجىقتارى» قىتايدا ۇلكەن سۇرانىسقا يە.
شاۋەشەك پەن شاعانتوعاي اۋدارىنىڭ اكىمدەرىمەن كەزىگىپ، ەكى جاقتى سۇرانىستى زەردەلەدىك. ءساتىن سالسا، ق ح ر اتالمىش اۋداندارىندا ءۇرجار اۋدانى ونىمدەرىنىڭ ساۋدا ۇيلەرى اشىلماق. وسى ارقىلى ءبىز دەلدالسىز ساۋداعا قول جەتكىزەمىز»، - دەپ ءتۇيدى س. زاينۋلدين.
