يتاليادا اتوم جوباسىنىڭ تۇساۋكەسەرى ءوتتى
اتالعان شاراعا يتاليانىڭ ساياسي، ساراپشىلىق، اكادەميالىق ورتاسىنىڭ جانە ب ا ق وكىلدەرى قاتىستى. دوڭگەلەك ۇستەل بارىسىندا ەلىمىزدىڭ جاھاندىق يادرولىق قارۋسىزداندىرۋ ۇدەرىسىنە قاتىسۋى، سونىمەن قاتار قازاقستان رەسپۋبليكاسىنىڭ نەگىزگى سىرتقى ساياسي باستامالارى، ونىڭ ىشىندە مادەنيەت ارالىق جانە ءدىن ارالىق ديالوگتىڭ ورىن الۋى، 2017-2018-جىلدارداعى ب ۇ ۇ قاۋىپسىزدىك كەڭەسىنىڭ تۇراقسىز مۇشەلىگىنە قاتىسۋعا قازاقستاننىڭ ءوتىنىشى، استانا قالاسى ەكسپو-2017 حالىقارالىق كورمەسىنىڭ وتكىزىلۋى كەڭىنەن اتاپ ءوتىلدى.
ق ر يتالياداعى ەلشىسى اندريان ەلەمەسوۆ پلەنارلىق بايانداما جاسادى. قازاقستاندىق ديپميسسيا باسشىسى ءوز سوزىندە يادرولىق قارۋسىزداندىرۋ جانە يادرولىق قاۋىپتىلىكتى ازايتۋ ۇدەرىسىندەگى قازاقستاننىڭ تەڭدەسسىز ۇلەسىن الەمنىڭ مويىنداپ وتىرعانىن اتاپ ءوتتى.
1991-جىلدىڭ 29- تامىزىندا ق ر پرەزيدەنتى ن. ءا. نازاربايەۆ جارلىعىمەن الەمدەگى ەڭ ءىرى يادرولىق سىناق الاڭدارىنىڭ ءبىرى سەمەي پوليگونىن ءبىرجولا جاپقاندىعى ءمالىم. ناتيجەسىندە قۋاتى بويىنشا ءتورتىنشى بولىپ تابىلاتىن الەمدەگى رەكەتالىق-يادرولىق ارسەنالدى يەلەنۋدەن ەلىمىز ەرىكتى تۇردە باس تارتتى.
شارادا قازاقستاننىڭ اتالعان ءرولدى تاڭداۋى كەزدەيسوق ەمەس ەكەنى اتاپ ءوتىلدى. 40 جىل ىشىندە كەڭەس وداعى سەمەي پوليگونىندا حيروسيموعا تاستالعان بومبادان جيىنتىق قۋاتى 2500 ەسە بولاتىن 456 يادرولىق جارىلىس جاسادى. سىناق ناتيجەسىنەن 1,5 ميلليون ادام زارداپ شەكتى، ءىرى جەر كولەمى رادياتسياعا ۇشىرادى. سوندىقتان قازاق حالقى يادرولىق سىناقتىڭ شىن زاردابىن بىلەدى. ءبىزدىڭ ەل 1000 نان استام يادرولىق قارۋدان باس تارتا وتىرىپ، پوليگونداعى يادرولىق سىناق ينفراقۇرىلىمىن جويا كەلە، قىرعىنعا ۇشىراتاتىن قارۋدان جەدەل باس تارتۋ ءۇشىن جالپىعا جاپپاي ۇندەۋ تاستاۋعا تولىق مورالدىق قۇقىعى بار. قازاقستاندىق ەلشى ءسوز سوڭىندا قاتىسۋشىلاردىڭ بارلىعىن اتوم جوباسىن قولداي وتىرىپ، يادرولىق قارۋسىز الەم ءۇشىن بىرلەسكەن جۇمىستاردى جالعاستىرۋعا شاقىردى.
يتالياندىق تاراپ وكىلدەرى ءوز كەزەگىندە قازاقستاننىڭ بەلسەندى تۇردە ايماقتىق جانە جاھاندىق ۇدەرىستەرگە قاتىسۋى بۇگىنگى كۇنى حالىقارالىق كۇن تارتىبىندەگى وزەكتى ماسەلەلەردى شەشۋگە ارنالعان ءتۇرلى تاسىلدەردى قامتاماسىز ەتۋ مۇمكىندىگىنە يە بولا الاتىندىعىن كورسەتەتىنىن بىرنەشە مارتە اتاپ ءوتتى.
دوڭگەلەك ۇستەل بارىسىندا اتوم جوباسىنىڭ قىزمەتى تۋرالى ماتەريالدار تاراتىلىپ، بەينەروليكتەر كورسەتىلدى.
