ق ر جازۋشىلار وداعىنىڭ مەرەيتويى قازاقتىڭ ماڭگى ەل بولۋىنىڭ باستى نىشانى - ءتوراعاسى نۇرلان ورازالين - فوتو
سالتاناتتى شارادا الماتى قالاسىنىڭ اكىمى احمەتجان ەسىموۆ، قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى ولجاس سۇلەيمەنوۆ، ك س ر و-نىڭ حالىق ءارتيسى، مەملەكەتتىك سىيلىقتىڭ لاۋرەاتى اسانالى ءاشىموۆ، قازاقستان عىلىم اكادەمياسىنىڭ پرەزيدەنتى، اكادەميك، مەملەكەتتىك سىيلىقتىڭ لاۋرەاتى مۇرات جۇرىنوۆ ءسوز سويلەدى.
قازاقستان رەسپۋبليكاسى پارلامەنتى سەناتىنىڭ دەپۋتاتى، قازاقستان جازۋشىلار وداعى باسقارماسىنىڭ ءتوراعاسى نۇرلان ورازالين قازاق قالامگەرلەرىنىڭ باسىن بىرىكتىرىپ وتىرعان ۇلكەن ينستيتۋت جايلى ءوز پىكىرىن ءبىلدىردى.
«ازاتتىققا قول جەتكەن العاشقى كۇننەن باستاپ، الەمدىك ينتەگراتسياعا ەركىن ارالاسىپ، ءوز شىندىعىن ءوزى دالەلدەپ، ءوز اقيقاتىن انىقتاپ بەرەر قازاق ەلىنىڭ قازىرگى تاڭداعى قۇرانداي كورىپ اسپەتتەگەن ۇرانى جالعىز، ول - تاۋەلسىزدىك. ەل پرەزيدەنتى ۇلىتاۋ تورىندە سۇحبات بەرگەندە ەلىمىزدىڭ ەڭ جوعارعى جەتىستىگى - تاۋەلسىزدىك دەپ بەكەر ايتپاعان. تاۋەلسىزدىك قانداي قىمبات بولسا، ءسوز دە سونداي قىمبات. قابىرعالى حالقىمىز سوزگە توقتاپ، ۇلتارالىق قاتىناستى دا سوزبەن رەتتەۋگە داعدىلانعان ەل. سول ونەردىڭ كوزىندەي بولعان جازۋشىلار وداعىنا بيىل 80 جىل تولىپ وتىر. بۇگىنگى مەرەكە نۇرسۇلتان نازاربايەۆتىڭ تىكەلەي باسشىلىعىمەن جۇزەگە اسىرىلا باستاعان ماڭگىلىك ەل بولۋدىڭ باستى نىشانى بولىپ وتىرعان ءتىل تويى»، - دەدى ن. ورازالين.
حالىق قالاۋلىسى ادامزاتتىڭ جازۋشىسى شىڭعىس ايتماتوۆتىڭ جازۋشىلار وداعىنا قاتىستى ايتقان ءسوزىن كەلتىرە كەتتى.
«20- عاسىردىڭ جارشىسىنداي بولعان ايتماتوۆ قازاقستان جازۋشىلار وداعىن زاماننىڭ جويقىن سىنىنا توتەپ بەرىپ، جەر سىلكىنىسىنەن امان قالعان الاتاۋدىڭ شىڭىنا بالاعان. قازاق جازۋشىلارى 6 قولىنا قالام ۇستاعان قالامگەر قاۋىمى دا ۋاقىت كوشىمەن بۋىنى بەكىپ، بۇلشىق ەتى شىڭدالدى. ەلىمىزدىڭ رۋحاني ءومىرىنىڭ قارا شاڭىراعىنا اينالدى. قازاق قالامگەرلەرى قازاق پەن عالام الدىنداعى ادال مىندەتتەرىن ادال اتقارۋ ۇستىندە، ولار قازاقتىڭ بىرلىگى مەن تۇتاستىعىن قامتاماسىز ەتۋ جولىندا ءاردايىم الدىڭعى لەكتەن كورىنىپ كەلەدى»، - دەدى ن. ورازالين.
اۆتور: گۇلميرا عوسمانالي
