ازەربايجان جازۋشىلار وداعىنىڭ ءتوراعاسى ەل باسى تۋرالى نە ايتتى؟

«شىنايى ونەردىڭ مەملەكەت قولداۋىنسىز ءومىر ءسۇرۋى وتە قيىن. مەن پرەزيدەنتتىڭ جازۋشىلار وداعىنا كورسەتىپ جاتقان قامقورلىعىن ايتا كەتكىم كەلەدى. نۇرسۇلتان نازاربايەۆ تەك قازاقستاننىڭ پرەزيدەنتى عانا ەمەس، بارلىق تۇركى الەمىنىڭ اقساقالى. نازاربايەۆتى ءبىزدىڭ ەلىمىزدە بارلىعى جاقسى كورەدى. ونىڭ جاقىندا «ەۋرازيا جۇرەگىندە» كىتابى شىقتى. ءبىز ونى ازەربايجان تىلىنە اۋداردىق. ول كىسىنى تۇلعا رەتىندە ازەربايجان زيالى قاۋىمى ۇلكەن قۇرمەت تۇتادى. تاتۋلىق پەن بىرلىكتە ناعىز ونەر مەن ادەبيەتتى جوعارى باعالايتىن وسىنشا حالىق ءبىر ءومىر ءسۇرىپ جاتىر»، - دەدى يلگار فاحمي.

ازەربايجاننان كەلگەن مەيمان قازاقستان جازۋشىلار وداعىنىڭ وزگە ەلدەرگە وزىق ۇلگى بولا الاتىندىعىن دا اتاپ ءوتتى.

«قازاقستان جازۋشىلار وداعى قاعاز جۇزىندە ەمەس، شىن مانىندە جۇمىس جاساپ وتىر. مۇندا ءتۇرلى شارالار وتەدى، كىتاپتار مەن جۋرنالدار شىعىپ جاتىر. مۇنداي يگى جاعداي ادامنىڭ قالام تۇرتۋىنە ىقپال ەتىپ، شىعارماشىلىعىنا شابىت قوسادى. ازەربايجان جانە قازاقستان ەلىندە مەملەكەت جازۋشىلاردىڭ وداعىنا، ادەبيەت الەمىنە ۇلكەن قولداۋ كورسەتۋدە»، - دەدى ازەربايجان جازۋشىسى.

ەستەرىڭىزگە سالا كەتەيىك، بۇگىن اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا قازاقستان جازۋشىلار وداعىنىڭ قۇرىلعانىنا 80 جىل تولۋىنا ارنالعان سالتاناتتى پلەنۋم بولدى.

سالتاناتتى شارادا الماتى قالاسىنىڭ اكىمى احمەتجان ەسىموۆ، قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى ولجاس سۇلەيمەنوۆ، ك س ر و-نىڭ حالىق ءارتسى، مەملەكەتتىك سىيلىقتىڭ لاۋرەاتى اسانالى ءاشىموۆ، قازاقستان عىلىم اكادەمياسىنىڭ پرەزيدەنتى، اكادەميك، مەملەكەتتىك سىيلىقتىڭ لاۋرەاتى مۇرات جۇرىنوۆ ءسوز سويلەدى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى