قازاقستاننان ءسۇت يمپورتىنىڭ ۇدەۋى رەسەيدى «قورقىتا» باستادى - ر. وشاقبايەۆ
ەسكە سالايىق، جيىن بارىسىندا تۇتىنۋشى ونىمدەرىن تەحنيكالىق رەتتەۋ ماسەلەلەرى تالقىلانعان بولاتىن.
«تەحنيكالىق رەتتەۋگە جاتاتىن ماسەلەلەر بۇگىنگى كۇنى كەدەن وداعى اياسىندا دا وزەكتى بولا ءتۇستى. ءبىرىنشى كەزەكتە ءبىزدىڭ وداق اياسىنداعى ارىپتەستەرىمىز تاۋارلاردىڭ رىنوكقا ەنۋىنە قارسى تاريفتىك ەمەس شەكتەۋلەردى ەنگىزىپ جاتىر. ءبىز قازىر «روسسەلحوزنادزور» تاراپىنان قازاقستاننان كەلەتىن سۇتتەرگە قاتىستى قىزۋ تالقىلاۋ جۇرگىزىلىپ جاتقانىن بىلەمىز. راسىندا، ءبىزدىڭ رەسەيلىك ارىپتەستەرىمىزدى قازاقستاندىق ءسۇت يمپورتى «قورقىتىپ» جاتىر. سوعان وراي، ولاردىڭ تاراپىنان قازاقستاننان ءسۇت جەتكىزۋگە نەگىزسىز شەكتەۋلەر قويىلۋى مۇمكىن دەپ ويلاپ وتىرمىز»، - دەدى ر. وشاقبايەۆ.
توقتالا كەتەتىن جايت، وتكەن جولى عانا رەسەي قازاقستاننىڭ ەكى كومپانياسىنا ەت اكەلۋگە تىيىم سالعان.
«راسىندا دا بۇل رەسەي ءوز اۋماعىنان ازىق-تۇلىك تاۋارلارىنىڭ ترانزيتىن تىكەلەي نەمەسە جاناما تۇردە شەكتەي بەرەتىنىن بىلدىرەدى. ەندەشە بۇل ماسەلە شىندىعىندا دا قۇقىقتىق باعالاۋعا الىنىپ، ۋاكىلەتتى ورگاندار تاراپىنان قانداي دا جاۋاپتى قادامدار جاسالۋى شارت»، - دەدى ۇ ك پ وكىلى.
اۆتور: قانات مامەتقازى ۇلى
