قازاقتان دا توبەلەسكىش ءبىر حوككەيشى شىقتى - فوتو
دامير رىسبايەۆ (بيىلعا دەيىن تەگى مۇقانعاليەۆ بولاتىن) بۇگىندە «بارىس» كلۋبىنىڭ نەگىزگى قۇرامىندا ويقاستاپ ءجۇر. مۇزايدىنعا شىعىپ، ويناپ تا قويادى. ءبىراق نەگىزگى مىندەتى - توبەلەسۋ. بويى - 187 سانتيمەتر. سالماعى - 92 كەلى. جاسى - 19,5-دا (1995-جىلى 25 ساۋىردە تۋعان).
اندرەي نازاروۆ «بارىس» كلۋبىنا باس باپكەر بولىپ تاعايىندالعان سوڭ، وسى ءداميردى توبەلەس-تافگاي حوكەيشى رەتىندە كوماندا ساپىنا تارتىپ ءجۇر. نەگىزى، نازاروۆتىڭ ءوزى حوككەي ويناعان كەزىندە توبەلەسكىش- تافگاي بولعان. سولتۇستىك امەريكاداعى ۇلتتىق حوككەي ليگاسىندا 12 ماۋسىم ويناپ، تانىمال تافگايلاردىڭ بىرىنە اينالعان.
باپكەرلىك كارەراعا اۋىسقالى دا مۇزايدىنداعى توبەلەستەن باس تارتپاي، ءتىپتى ءوز قاراماعىندا تافگاي حوككەيشى بولعانىن قالايتىنداي. اسىرەسە رەسەيدىڭ «ۆيتياز» كلۋبىندا باس باپكەر بولعان كەزىندە مۇحيتتىڭ ار جاعىنداعى ۇ ح ل-دان بىرنەشە تافگايدى ءوز كومانداسىنا الدىرتقان. «ۆيتياز» كلۋبىنىڭ ساپىنداعى «شاش ال دەسە، باس الاتىن» تافگايلار قۇرلىقتىق حوككەي ليگاسىن ءبىراز «شۋلاتقان- دا».
ەندى «بارىسقا» كەلىپ، جاپ-جاس ءداميردى مۇزايدىنداعى توبەلەسكە «باۋلىپ» جۇرگەندەي. وتكەن جۇمادا، ياعني 31- قازان كۇنى «بارىس» استانادا رەسەيدىڭ (نيجنەكامسكىنىڭ) «نەفتەحيميگىن» قابىلداعان. وسى ويىنىڭ باسىندا دامير رىسبايەۆ توبەلەسىپ، قوناقتاردىڭ ەكى ويىنشىسىن تومپەشتەدى. ەكەۋىندە مۇزايدىنعا جىقتى. حوككەيدە بۇل «جەڭىس» بولىپ سانالىپ، توبەلەس توقتاتىلادى.
دامير اۋەلى نيكولاي بەلوۆپەن ايقاستى. بويى - 192 سانتيمەتر، سالماعى - 85 كەلى، 27-دەن اسقان تاجىريبەلى حوككەيشىنى مۇزايدىنعا جىعىپ العانى سول ەدى، تورەشىلەر ۇرعىزباي اجىرىتىپ الدى. دامير ونىمەن شەكتەلمەي، قوناقتاردىڭ حوككەيشىلەرىنە «تاعى قايسىڭ شىعاسىڭ» دەگەندەي يشارا تانىتىپ ەدى، وزىمەن قۇرداس الەكساندر برىنتسيەۆ جاعاسىنا جارماستى. ءداميردىڭ كۇشى باسىمداۋ كورىندى. ايتەۋىر بويى - 191 سانتيمەتر، سالماعى - 89 كەلى برىنتسيەۆتى جۇلقىپ-اق قۇلاتتى. تاعى دا تورەشىلەر ايىرىپ الدى. قوناقتاردىڭ مۇزايدىن سىرتىندا دەمالىپ وتىرعان ويىنشىلارىنىڭ ءبىرى بىردەڭە دەدى مە، دامير ونى دا جەكپە-جەككە شاقىرىپ ەدى، ول شىقپادى.
بۇل - ءداميردىڭ قۇرلىقتىق حوكەي ليگاسىنداعى العاشقى رەسمي توبەلەستەرى. ول بۇعان دەيىن دە توبەلەسكەن. شايبالى حوككەيدە 16 جاسىنان بەرى اندا-ساندا توبەلەسىپ قالىپ جۇرگەن. بۇرىن دوستارى ءۇشىن توبەلەسسە، ەندى ءوزىنىڭ ايتۋى بويىنشا، باس باپكەر اندرەي نازاروۆ وعان ويىن ۇستىندە توبەلەسۋدى ارنايى تاپسىراتىن دا كورىنەدى.
بيىل ماۋسىم باسىندا «بارىس» بىرنەشە تۋرنيرگە قاتىسىپ، دايىندىعىن پىسىقتاعان. سوندا ول ەكى رەت توبەلەستى. ەكاتەرينبۋرگتە وتكەن «كامەننىي سۆەتوك» تۋرنيرىندە جەرگىلىكتى «اۆتوموبيليست» كلۋبىنىڭ ويىنشىسى نيكيتا كوماروۆپەن جۇدىرىقتاسقانىندا ەسە جىبەرىپ العانعا ۇقسايدى. بۇل توبەلەستىڭ بەينەجازباسى (ۆيدەوسى) ەش جەردە جوق، ءبىراق سولاي ەستيمىز. نيكيتا كوماروۆتىڭ بويى - 188 سانتيمەتر، بويى - 95 كەلى، جاسى 26 دان اسقان. ەندى «بارىس» وسى «اۆتوموبيليست» كلۋبىمەن كەزدەسكەندە، رىسبايەۆ - كوماروۆ توبەلەسىنىڭ جالعاسى بولۋى ادبەن مۇمكىن.
ءداميردىڭ مۇزايدىندا توبەلەسىپ جۇرگەنى دۇرىس پا، بۇرىس پا بىلمەيمىز. كەيبىر جانكۇيەرلەر «جاپ-جاس جىگىت، توبەلەسكەننەن گورى حوككەي ويناعانى دۇرىس، بۇعاناسى ءالى قاتپاعان، جاستايىنان ساقا جىگىتتەردى توپەلەپ ۇرا بەرسە، بۇل باسقالاردىڭ شامبايىنا ءتيۋى ابدەن مۇمكىن، ال سۆيتوۆ جانە ارتيۋحين سىندى داۋلەردىڭ قولىنا تۇسسە، ولار ءبىر جەرىن مەرت قىلۋى دا ىقتيمال» دەپ جاناشىرلىق بىلدىرۋدە.
ارينە، دجەرەمي يابلونسكي، كريس سايمون، دجون ميراستي، دارسي ۆەرو، دجوشۋا گرەتتون سىندى مۇزايدىنداعى توبەلەستىڭ حاس شەبەرلەرىنە تاپ بولسا، جاپ-جاس ءداميردىڭ تاياق جەپ قالۋى مۇمكىن. راس، قازىر بۇلاردىڭ بارلىعى دەرلىك ق ح ل-دا وينامايدى. دەسەك تە، ەۆگەني ارتيۋحين جانە الەكساندر سۆيتوۆ سىندى ءتىس قاققان توبەلەسكىش حوككەيشىلەر بار.
دامير رىسبايەۆ «نەفتەحيميك» كلۋبىنىڭ ەكى ويىنشىسىن سۇلاتىپ سالسا دا، عالامتورداعى ونىڭ توبەلەسىنىڭ بەينەجازباسىنىڭ استىنا پىكىر قالدىرعان كەيبىر قازاق جانكۇيەرلەرى «باس باپكەردىڭ ەشتەڭەسى دە كەتپەيدى، دامير باۋىرىم بايقا، بىرەۋدىڭ ايتقانىنا بولا ورىنسىز توبەلەسە بەرمە، جاسسىڭ ءالى، ابايلا» دەپتى...
ءبىز دە «دامير توبەلەستى تىم ەرتە باستاعان جوق پا ەكەن» دەپ قوبالجيتىنىمىزدى جاسىرا المايمىز. راس، اتا-بابامىز جاۋىنگەرلىك رۋحپەن وسكەن، جەكپە-جەكتەن قايتپاعان. دەسەك تە، دامير مۇزايدىنداعى توبەلەستەرىن قوش كورمەي ءجۇرمىز...
