ەلەكتروندى وقىتۋ مۇعالىمدەردى قاعاز باستىلىقتان ارىلتادى - ر. ەڭسەبايەۆ
بۇگىن ءماجىلىستىڭ الەۋمەتتىك- مادەني دامۋ كوميتەتىنىڭ كەڭەيتىلگەن وتىرىسىندا «ۇلتتىق اقپاراتتىق تەحنولوگيالار» ا ق باسقارما ءتوراعاسى رۋسلان ەڭسەبايەۆ وسىلاي ءمالىم ەتتى.
«ەلباسى مۇعالىمدەردىڭ ەسەپ- قيساپتى تولتىرۋمەن ەمەس، تەك بالا وقىتۋمەن اينالىسۋى كەرەكتىگىن بىرنەشە رەت كوتەرگەنى بەلگىلى. ال وسى پروبلەمانى «ەلەكتروندىق وقىتۋ» جۇيەسى شەشە الادى. بۇل جۇيە ەنگىزىلگەن مەكتەپتەردە مۇعالىم وقۋشىنىڭ ۇلگەرىمى، ونىڭ ساباققا قاتىسۋى بويىنشا بارلىق اقپاراتتى ەلەكتروندىق نۇسقامەن ەنگىزەدى. سوسىن جۇيە ارقاسىندا مينيستر دە، ءبىلىم دەپارتامەنتىنىڭ وكىلدەرى دە مەكتەپتەردى مازالاماستان- اق، قاجەتتى ستاتيستيكالىق مالىمەتتى بازادان الاتىن بولادى»، - دەدى ر. ەڭسەبايەۆ.
ونىڭ ايتۋىنشا، جۇيە ەنگىزىلگەن مەكتەپتەردەگى باستى ماسەلە اقپاراتتاردىڭ قايتالانۋى بولىپ وتىر.
«شىندىعىندا، مۇعالىمدەر ءاربىر باعانى قايتالاپ، ونى بىرەسە ەلەكتروندىق نۇسقاعا، بىرەسە قاعاز جۋرنالعا قويىپ ءجۇر، ويتكەنى ولاردان وسى تالاپ ەتىلەدى. البەتتە، بۇل ارتىق شارۋا، اسىرەسە، جوبانىڭ باسىنان باستاپ قاتىسىپ جۇرگەندەرگە قيىنداۋ. سوندىقتان دا ەڭ ءبىرىنشى كەزەكتە جۇمىستىڭ جارىسا، قوسارلانا جۇرگىزىلۋىن بولدىرمايتىنداي ۇيىمداستىرۋ شارالارىن ەنگىزىپ، ەڭ قۇرىعاندا سىناق تۇرىندە بولسا دا جاساپ كورۋ كەرەك»، - دەدى ر. ەڭسەبايەۆ.
ءوز كەزەگىندە دەپۋتات گۇلنار ىقسانوۆا كەيبىر وڭىرلەردە اكىمدىكتەر وزدەرىنىڭ ەلەكتروندىق جۇيەلەرىن ەنگىزىپ جاتقانىن، سول جۇيەگە مۇعالىمدەر وزدەرىنىڭ وقۋ ۇلگەرىمى بويىنشا اقپاراتتارىن دا ەنگىزە الاتىنىن اتاپ ءوتتى.
اۆتور: قانات مامەتقازى ۇلى
