ءوزىن «ارقانمەن جۇرۋشىلەردىڭ پاتشاسى» دەپ اتايتىن اكروبات كەزەكتى رەت رەكورد ورناتتى - كەسكىن
35 جاستاعى امەريكالىق اكروبات ارقانمەن ءجۇرىپ وتۋدەن كەزەكتى رەت رەكورد ورناتتى. چيكاگو قالاسىندا ونىڭ بۇل ەرلىگىن تاماشالاۋعا ون مىڭداعان حالىق جينالدى. ارقانداردىڭ ءبىرى چيكاگو وزەنىنىڭ ۇستىمەن 19 گرادۋس قيعاشتاپ تارتىلعان. ەكىنشىسى Marina City زەڭگىر ءۇيدىڭ قوس مۇناراسى اراسىندا 183 مەتر بيىكتىكتە تارتىلعان. بۇل قاشىقتىقتى ۆاللەندا كوزىن جۇمىپ، ەش ساقتاندىرۋ قۇرالىنسىز ءجۇرىپ ءوتتى. وسىناۋ ارەكەتىنە قايران قالعان كورەرمەن وعان دەگەن قوشەمەتىن ايامادى.
«مەن چيكاگونى سۇيەمىن. چيكاگو دا مەنى سۇيەتىن ءتارىزدى»، - دەدى كەزەكتى رەكوردىن ورناتقان اكروبات.
ۆاللەندا ارقان جۇرۋگە ماشىقتانعان ايگىلى اكروباتتار وتباسىنىڭ مۇشەسى. ونىڭ اتاسى 73 جاسىندا پۋەرتو-ريكودا قوس عيماراتتىڭ اراسىندا تارتىلعان ارقانمەن ءجۇرىپ وتپەك بولعان كەزىندە كوز جۇمعان. سوڭىرا نيك اتاسىنىڭ ورىندالماي قالعان جوسپارىن اناسىمەن قوسا جۇزەگە اسىردى.
ءوزىن «ارقانمەن جۇرۋشىلەردىڭ پاتشاسى» دەپ اتايتىن ۆاللەندانىڭ وزگە رەكوردتارىنىڭ اراسىندا نياگارا سارقىراماسى مەن گراند-كانون ارقىلى ءجۇرىپ وتكەن جەتىستىكتەرىن ايتىپ وتۋگە بولادى.
BNews.kz
