شىعىس قازاقستاندا الەۋمەتتىك نىساندار سانى ارتىپ كەلەدى

 تاياۋدا تارباعاتاي اۋدانىندا جاڭا دارىگەرلىك ەمحانا جانە بيزنەس پەن مەملەكەتتىڭ سەرىكتەستىگى اياسىندا سالىنعان بالاباقشا قولدانىسقا بەرىلدى، دەپ جازادى 24.kz.

جاڭااۋىل - شىعىستىڭ شالعايىندا، قىتايمەن شەكارالاس ايماقتا ورنالاسقان ەلدى مەكەننىڭ ءبىرى. مىڭنان استام حالىق تۇراتىن اۋىلدا جاڭا مەديتسينالىق عيمارات ءبىرىنشى رەت اشىلدى. وسىعان دەيىن اق حالاتتىلار بالاباقشانىڭ ءبىر بۇرىشىن پانالاۋعا ءماجبۇر بولىپتى. ەندى مەملەكەت قامقورلىعىنىڭ ارقاسىندا ءوز الدىنا جەكە عيماراتقا قول جەتكىزىپ وتىر. سوڭعى جىلدارى جالپى وبلىس كولەمىندە 30 وسىنداي دارىگەرلىك ەمحانا ىسكە قوسىلىپتى. ال جاڭااۋىلدا اشىلعان مەديتسينالىق مەكەمە تارباعاتاي اۋدانىندا ءۇشىنشى بولىپ وتىر.

 تارباعاتاي اۋدانىندا سونىمەن قاتار مەملەكەتتىك «بالاپان» باعدارلاماسى دا ءساتتى جۇزەگە اسىپ كەلەدى ەكەن. بۇل ورايدا كاسىپكەرلىكتىڭ الەۋمەتتىك جاۋاپكەرشىلىگىنىڭ جۇمىسى جەمىستى. جەرگىلىكتى كاسىپكەرلەردىڭ قولداۋىمەن سوڭعى 2 جىل ىشىندە اۋداندا 400 دەن اسا بالانى ورىنمەن قامتىعان 10 بالاباقشا ىسكە قوسىلعان. سولاردىڭ ءبىرى - اقجار اۋىلىندا جاقىندا اشىلعان 50 ورىندىق باقشا. وندا نەگىزىنەن الەۋمەتتىك جاعدايى تومەن وتباسىلاردىڭ بالالارى تاربيەلەنۋدە. بۇل ورايدا، كەلەر جىلدان باستاپ شالعايدان ورىن تەپكەن 5 اۋىلدا 50, 75, 100 ورىندىق باقشالار بوي كوتەرمەكشى. وسىلايشا اۋدان كولەمىندە 1-2 جىل ىشىندە «بالاپان» باعدارلاماسى تولىق جۇزەگە اسادى دەپ كۇتىلۋدە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى