تورونتو جۇرتشىلىعى «استانا وپەرا» ونەرپازدارىنىڭ ونەرىنە ءتانتى بولدى - فوتو
كەش لەزدە وتە شىققانداي اسەر بەرىپ، كورەرمەننىڭ ارتىستەردى جىبەرگىسى كەلمەگەنى بار، ءتىپتى، كونسەرتتەن كەيىن ايگىلى Sony Centre ەسىگىنە جيىلعان جۇرت ولاردى كۇتىپ تۇرعان اۆتوبۋسقا دەيىن شىعارىپ سالدى، دەپ حابارلادى اتالعان ونەر ورداسىنىڭ باسپا ءسوز قىزمەتى.
كونسەرت الدىندا وتكەن باسپا ءسوز ءماسليحاتىندا جۋرناليستتەر ەلوردالىق تەاتردىڭ تەحنيكالىق مۇمكىندىكتەرى، «استانا وپەرا» رەپەرتۋارىن تولىقتىرعان الەمدىك دەڭگەيدەگى قويىلىمدار، سونداي- اق قولجەتىمدى بيلەت باعاسى جايلى كوپتەگەن سۇراقتار قويىپ جاتتى. تەاتر ديرەكتورى تولەگەن مۇحامەدجانوۆ اتالعان ساۋلەتتى عيماراتتىڭ بىرەگەيلىگى تۋرالى تولىعىراق ايتىپ بەردى دە، قازاقستانعا وسىنداي تاماشا سىيلىق جاساعان پرەزيدەنتىمىز نۇرسۇلتان نازاربايەۆقا جاڭا ونەر ورداسى ءۇشىن العىس ءبىلدىردى.
ديرەكتور، سونىمەن قاتار، ءبىز الەمنىڭ ءارتۇرلى ەلدەرىمەن دوستىق كوپىرىن مادەنيەت ارقىلى قالايتىنىمىزدى اتاپ ءوتتى. تولەگەن مۇحامەدجانوۆ بارلىعىن قازاقستانعا، وتە يكەمدى باعا ساياساتىن ۇستاناتىن جانە كەز كەلگەن كونتسەرتىنىڭ بيلەتىن 2 دوللار 80 سەنتتەن باستالاتىن باعاعا ساتىپ الۋعا بولاتىن «استانا وپەرا» تەاترىنا شاقىردى، مۇنداي باعا ب ا ق وكىلدەرىن تاڭ قالدىرعانى ءسوزسىز.
«قازاقستان حالقىنىڭ قانشالىقتى ونەرلى ەكەنىن، ونىڭ مادەنيەتىنىڭ قانشالىقتى سان قىرلى ەكەنىن كاناداداعىلار جاقسى بىلەدى، الايدا سىرتتاي ءبىلىپ، ول جايلى وقىپ، ەستىگەن ءبىر بولەك تە، مۇنداي «استانا وپەرا» تەاترىنىڭ سيمفونيالىق وركەسترى، حورى مەن تاماشا سوليستتەرىنەن تۇراتىن كاسىبي ۇجىمدى ءوز كوزىڭمەن كورگەن ءبىر بولەك. قازاقستاننىڭ مادەنيەتىندە ءبىر توبە بولىپ تۇرعان ونەر ورداسىن شاقىرۋدان باستالعان مادەني سالاداعى دامۋ ءۇردىسى جالپى ەكى جاقتىڭ قارىم- قاتىناسىنا پايداسىن تيگىزەدى دەپ ويلايمىن. ەكونوميكانى، ساياسي بايلانىستى عانا دامىتىپ قويۋ جەتكىلىكسىز، حالىقتىق ديپلوماتيانى، مادەني قارىم- قاتىناس سالاسىنداعى سەرىكتەستىكتى دە دامىتۋ قاجەت. بۇل كانادامەن مادەني سالا قارىم- قاتىناسىن دامىتۋداعى العا باسقان ءبىرىنشى، ماڭىزدى، ۇلكەن قادامىمىز. «ەڭ ۇزاق جول العاشقى قادامنان باستالادى» دەمەكشى، وسى تۇرعىدا ءبىز ماقالدى ۇستانامىز دەپ ۇمىتتەنەمىن، الايدا بۇل ىلگەرى باسقان العاشقى قادام ەمەس، ۇلكەن قادام»، - دەدى «استانا وپەرا» تەاترىنىڭ ترۋپپاسىن Sony Centre ساحناسىندا قارسى العان قازاقستاننىڭ كاناداداعى ەلشىسى كونستانتين جيگالوۆ.
وسىدان كەيىن كوپتەن كۇتكەن كونسەرت باستاۋ الدى. ارتىستەر پاش ەتكەن ءماندى دە، مانەرلى باعدارلامادا قازاقتىڭ ۇلتتىق مۋزىكاسى جانە وپەرا ونەرىنىڭ الەمدىك جاۋھارلارى بار. اتالعان ساحنادا ونەر كورسەتۋ كەزىندە ترۋپپا شامالى قوبالجىدى، نەگە دەسەڭىز، ۋاقىت تىعىز، رەپەتيتسياسىز بىردەن شىعۋ كەرەك، دەگەنمەن مۇنداي ىڭعايسىزدىققا قاراماستان، كونسەرت قۇلاق قۇرىشىن قاندىرىپ، تاماشا ونەر كورسەتتى.
كورەرمەن قاتارىندا كوزدەرىنە جاس الىپ قايتقان كاناداداعى قانداستارىمىز دا بولدى. تورونتو قالاسىنىڭ تۇرعىنى سوفيا سەدەلنيكوۆا كوپتەگەن ەلدەردە بولعانىن، سانداعان ايتۋلى وركەسترلەردى تىڭداعانىن، الايدا بۇرىن- سوڭدى مۇنداي تاماشا اسەردە بولماعانىن ايتادى.
كانادالىقتاردى ۇلتتىق مۋزىكا جانە كورنەكتى سكريپكاشى ەرجان كۇلىبايەۆتىڭ كەرەمەت ويناعانى ەرەكشە اسەرگە بولەپ، تىڭدارمان ونى «بولاشاقتىڭ سكريپكاشىسى» دەپ اتادى. كونسەرتتى «استانا وپەرا» ونەر ۇجىمىنىڭ بار قۋاتىن كورسەتەتىن ن. بوروديننىڭ «يگور كنياز» وپەراسىنان قىپشاقتار كورىنىسى اياقتاپ، زالداعىلاردى ورنىنان تۇرعىزدى، ارينە، كوپشىلىكتىڭ شالقىعان كوڭىلىنە ساي بۇل مۋزىكالىق شىعارما ەكىنشى مارتە «بيسكە» ورىندالدى.
تورونتو ۋنيۆەرسيتەتىنىڭ ۇستازى، بۇرىنعى جەرلەسىمىز زەمفيرا پولاس سوليستەردىڭ ورىنداۋ دەڭگەيىنىڭ جوعارىلىعىنا جانە وركەستردىڭ تازا وينايتىنىنا ءتانتى بولعانىن، سونداي- اق، بۇل - ارتىستەرمەن قاتار، تەاتر باسشىلىعىنىڭ ۇلكەن جۇمىس اتقارعانىنىڭ جەمىسى ەكەنىن اتاپ ءوتتى.
