جاۋىنگەرلەر زورلىقپەن الىپ كەتكەن وقۋشى قىزداردى كۇشتەپ كۇيەۋگە بەرۋدە
بۇل تۋرالى «بوكو حارام» ۇيىمىنىڭ جەتەكشىسى ابۋباكار شەكاۋ ءوزىنىڭ بەينە ۇندەۋىندە ءمالىم ەتتى.
مۇنىڭ الدىندا ول وسى جىلدىڭ ءساۋىر ايىندا زورلىقپەن الىپ كەتكەن قىزداردى تۇتقىنعا الىنعان جاۋىنگەرلەرمەن الماستىرۋدى ۇسىنعان بولاتىن. الايدا ەل بيلىگى بۇل ۇسىنىسقا كەلىسۋدەن باس تارتقان. قازىرگى تاڭدا 57 وقۋشى قىز ءوز وتباسىلارىمەن قايتا قاۋىشقان، ال 219 قىزدى جاۋىنگەرلەر كەپىلدە ۇستاپ وتىر. شەكاۋدىڭ ايتۋىنشا، 219 قىزدىڭ بارلىعى دا يسلام ءدىنىن قابىلداعان جانە كۇشتەپ كۇيەۋگە بەرىلگەن.
سونداي-اق شەكاۋ نيگەريا ۇكىمەتىمەن جاسالعان بىتىمگەرشىلىك تۋرالى اقپارات شىندىققا ساي كەلمەيتىنىن مالىمدەدى. مۇنىڭ الدىندا نيگەريا قارۋلى كۇشتەرى قورعانىس شتابىنىڭ باستىعى الەكس بادەح «بوكو حارام» ۇيىمىمەن كەلىسىمگە كەلگەنى تۋرالى حابارلاعان بولاتىن.
الايدا شەكاۋدىڭ سوزىنشە، نيگەريا بيلىگىنىڭ بىتىمگەرلىككە قاتىستى بارلىق مالىمدەمەلەرى جالعان ەكەن. ءتىپتى ول بيلىكتىڭ بۇل ارەكەتى الدا بولۋ مۇمكىن كەز كەلگەن كەلىسۋ مۇمكىندىكتەرىن بولدىرماي قويۋعا يتەرمەلەيتىنىن جەتكىزدى.
«بوكو حارام» - نيگەريادا بەلسەندى ارەكەت ەتىپ جاتقان يسلاميستتىك راديكالدى توپ. ولاردىڭ جاۋىنگەرلەرى باتىستىق ءبىلىم بەرۋ ۇلگىسىنە قارسى شىعىپ، بارلىق ەلگە شاريعاتتى ەنگىزۋگە ۇمتىلىپ وتىر. نيگەريا پرەزيدەنتى گۋدلاك دجوناتان بۇدان ءبىر جىل بۇرىن «بوكو حارام» جاۋىنگەرلەرىنىڭ شابۋىل جاساۋ قاتەرىنە بايلانىستى ءبىرقاتار شتاتتاردا توتەنشە جاعداي ەنگىزۋ تۋرالى حابارلاعان بولاتىن.
tengrinews.kz
