الاش ايناسى گازەتى مەن سەن - قازاق سايتى ارىپتەستىك بايلانىس ورناتتى

«Senkazakh.com» سايتى شەتەلدەگى قازاق ءتىلدى سايتتار اراسىندا ەرەكشە كوزگە ءتۇسىپ كەلە جاتقان پورتالداردىڭ ءبىرى. قازىرگى تاڭدا اتالمىش سايتتى قىتايداعى قازاق باۋىرلارىمىز شىعارىپ كەلەدى. باس رەداكتورى -  احىتبەك شەريزات ۇلى. دەمەك ولار بۇگىندە قازاقستان مەن قىتاي اراسىندا اقپاراتتىق كوپىر قىزمەتىن اتقارىپ وتىر. ءبىر ەرەكشەلىگى، «senkazakh.com» سايتى تەك توتە جازۋمەن عانا ەمەس، سونىمەن قاتار كيريليتسا ارپىمەن دە اقپارات تاراتىپ كەلەدى. ياعني شەتتە جۇرگەن قانداستارىمىز وسى سايت ارقىلى قازاقستانداعى جاڭالىقتاردى ەستىپ-ءبىلىپ وتىرسا، ءبىز دە وسى پورتالدىڭ كومەگىمەن ارعى بەتتەگى اعايىننىڭ تىنىس-تىرشىلىگىنەن قۇلاعدار بولىپ وتىرامىز. مالىمەتتەرگە سۇيەنسەك، اتالمىش سايتقا ءبىر كۇندە 2 مىڭعا جۋىق ماقالا سالىنادى ەكەن، ال قارالىمى جاعىنان پورتالدىڭ كۇندىك كورسەتكىشى 100 مىڭنان اسىپ جىعىلاتىن كورىنەدى. ونىمەن قوسا، بۇگىندە سايتتاعى اقپاراتتىق تانىمدىق مالىمەتتەر 2 ميلليونعا جەتسە، تۇراقتى تىركەلۋشىلەر سانى 60 مىڭ ادامنان اسىپ كەتكەن.

جالپى ايتقاندا، «Senkazakh.com» ينتەرنەت پورتالىنىڭ قوزعامايتىن تاقىرىبى جوق. وندا اقپاراتتار اعىنى، ساياسي ساراپتاما، ۇرپاق تاربيەسى، جاستار ماسەلەسى، ءبىلىم مەن عىلىم، كاسىپ پەن ءناسىپ، سالاۋات پەن سەرگەكتىك، قۇقىقتىق ساۋات اشۋ، ءتىل مەن ءدىل، ەكى ەل اراسىنداعى ىنتىماقتاستىق بايلانىس، ءبىر سوزبەن ايتقاندا، اتالمىش سايت الەۋمەتتىك-قوعامدىق تاقىرىپتار ءجيى تالقىلاناتىن اشىق الاڭعا اينالعان. سونداي-اق سايتتا وقىرماننىڭ كەلەلى ويىنا دا، تاتىمدى تۇجىرىمىنا دا ويىپ تۇرىپ ورىن بەرىلەدى.

قالاي دەسەك تە، شىندىقتىڭ شارايناسى، اقيقاتتىڭ الداسپانىنا اينالعان «الاش ايناسى» مەن «Senkazakh.com» سايتىنىڭ ارىپتەستىك بايلانىسى حالىقتىڭ مۇڭىن مۇڭداپ، جوعىن جوقتاۋمەن ۇشتاسا بەرەتىن بولادى دەگەن ۇمىتتەمىز.

«الاش ايناسى»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى