مايا مانەزا: ەش ايانىپ قالمايمىن

- مايا، لوندون وليمپياداسىنان كەيىن ەكى جىلداي ۋاقىت دەمالدىڭىز. سول ارالىقتا جەكە ومىرىڭىزدە ءبىراز وزگەرىستەر بولدى. سول جاعىمدى جاڭالىقپەن ءسىزدى العاشقىلاردىڭ ءبىرى بولىپ «ايقىن» گازەتى دە قۇتتىقتاعان ەدى...

- ءيا، وليمپيادا ويىندارىنان ورالعاننان كەيىن ومىرىمدە وڭدى وزگەرىستەر بولدى. بىرىنشىدەن، ۆياچەسلاۆ ەرشوۆپەن تۇرمىس قۇردىم. بۇل جايىندا كەزىندە بارلىق ب ا ق وكىلدەرى اقجارما كوڭىلدەرىن ءبىلدىرىپ، جەر-جاھانعا جاريا ەتتى. سولاردىڭ اراسىندا «ايقىن» گازەتى دە بار. قازاقى داستۇرمەن الاتاۋ باۋرايىندا دۇركىرەتىپ تۇرىپ توي جاسادىق. ەكىنشىدەن، ۇلىمىز ارسەني ومىرگە كەلدى. بالاپانىم ءسۇپ-سۇيكىمدى بولىپ ءوسىپ كەلەدى. بۇل مەنىڭ ومىرىمدەگى ەڭ ءبىر قۋانىشتى ساتتەر دەپ ايتار ەدىم. سۇيگەن ادامعا جار بولۋ، انا بولۋ ايەل ادام ءۇشىن ەڭ باستى باقىت ەمەس پە؟!

- جۇبايىڭىزدى كوپتەن بەرى تانيتىن ەدىڭىز بە؟

- بىرەر جىل ارالاسىپ، سىيلاستىق. ول دا قازاقستاننىڭ بەلدى سپورتشىلارىنىڭ ءبىرى. ەكەۋمىزدى تانىستىرعان دا، تابىستىرعان دا - اۋىر اتلەتيكا. سلاۆا 2006-جىلى دوھادا ازيا ويىندارىندا جەڭىمپاز اتانعانىن جانكۇيەرلەر جاقسى بىلەدى. باسقا دا كوپتەگەن حالىقارالىق جارىستاردا باق سىنادى. ەكەۋمىز وقۋ-جاتتىعۋ جيىندارى كەزىندە تانىستىق. تەز-اق ءتىل تابىسىپ كەتتىك. بىرتە-بىرتە دوستىعىمىز، سىيلاستىعىمىز ماحابباتقا ۇلاستى. نەگىزى، سپورتتىڭ سوقپاعىنا ءبىر تۇسكەن ادامنىڭ قولى كوپ بوساي بەرمەيدى عوي. كەي كەزدەرى ءبىر-بىرىمىزدەن جىراقتا جۇرۋگە تۋرا كەلدى. ءبىراق سەزىمىمىز ودان سۋىعان جوق. ونىڭ ۇستىنە، مەن وليمپيادا ويىندارىنا تىڭعىلىقتى دايارلاندىم. سول كەزدەرى سلاۆا مەنى ۇنەمى قولداپ، دەمەپ ءجۇردى. ابىروي بولىپ، لوندونداعى دودانىڭ التىن تۇعىرىنا كوتەرىلۋ باقىتى بۇيىردى. سودان كەيىن ەكەۋمىز بارلىق قۇجاتتاردى راسىمدەپ، ەرلى-زايىپتى بولدىق.

-  بۇعان دەيىن ءسىز ەكى بىردەي الەم چەمپيوناتىندا توپ جاردىڭىز. سول ناتيجەنى الماتىدا قايتالاۋ قيىن بولماي ما؟ قانشا دەگەنمەن ەكى جىلدان اسا ۇلكەن سپورتتان قول ءۇزىپ قالدىڭىز ەمەس پە؟

-  مەن جاستايىمنان وسى سپورت ءتۇرىن سەرىك ەتىپ كەلەمىن. اۋىر اتلەتيكانى بۇگە-شىگەسىنە دەيىن بىلەمىن دەپ ايتسام دا بولادى. تالاي سىناقتان وتتىك، تالاي ۇلى دۇرمەكتى كوردىك. وسىنىڭ بارلىعى -  ۇلكەن تاجىريبە مەكتەبى. ارينە، بىرەر جىل ۇلكەن سپورتتان قول ءۇزىپ قالعانىمنىڭ اسەرى بولارى انىق. ءبىراق مەن الەم چەمپيوناتىنا تىڭعىلىقتى دايارلانىپ جاتىرمىن. ءوز جانكۇيەرلەرىمنىڭ سەنىمىن اقتاۋ ءۇشىن ەش ايانىپ قالمايمىن. جەڭىسكە جەتۋ جولىندا بارىمدى سالامىن.

- الماتىداعى جارىستا باستى قارسىلاستارىڭىز كىمدەر دەپ ويلايسىز؟

- ءبىزدىڭ سالماقتا مىقتى قىزدار كوپ. ولاردىڭ كەيبىرىن بۇرىننان تانيمىن. كەيبىرى جالىنداپ ءوسىپ كەلە جاتقان جاستار. بارلىعىنان دا قاۋىپتەنۋ كەرەك. مەن ولاردىڭ ءارقايسىسىن ءوزىمنىڭ باستى باسەكەلەستەرىم دەپ سانايمىن. ەڭ نەگىزى قارسىلاسىم -  زىلتەمىر. ءوزىم تاپسىرىس بەرگەن سالماقتى ەڭسەرە السام، وندا مەنى توقتاتۋ قيىن بولادى.

- الەم چەمپيوناتىنا دايارلانۋ بارىسىندا كىمدەر ەرەكشە قولداۋ كورسەتتى؟

- قازاقستاندا اۋىر اتلەتيكاعا ەرەكشە كوڭىل ءبولىنىپ جاتىر. بۇل جايت ءبىزدى قۋانتادى. قانداي جارىسقا شىقساق تا، جانكۇيەرلەردىڭ جىلى ىقىلاسىن ۇنەمى سەزىنەمىز. سپورت باسشىلارى، رەسپۋبليكالىق اۋىر اتلەتيكا فەدەراتسياسى، جەرگىلىكتى اكىمدەر ەش الاڭسىز دايارلانۋىمىزعا بارىنشا جاعداي جاساۋدا. سونىمەن قاتار «دينامو» سپورت قوعامى تاراپىنان دا قولداۋ كورسەتىلۋدە. بۇل دا تەگىن ەمەس. ويتكەنى مەن ۇلتتىق گۆارديانىڭ ساربازىمىن. سەرجانت دەگەن شەنىم بار. بۇل مەن ءۇشىن ۇلكەن ماقتانىش. بۇيىرتسا، وفيتسەرلىك شەنگە دە قول جەتكىزىپ قالۋىم مۇمكىن. ارينە، وسىنداي قولداۋ مەن قامقورلىق كورسەتىلىپ جاتقاندا ءبىزدىڭ بوساڭسۋعا قاقىمىز جوق.

-  ريو-دە جانەيرو وليمپياداسى تۋرالى نە ايتاسىز؟ ەكى جىلدان كەيىن برازيليادا وتەتىن دوداعا دا قاتىسۋدى جوسپارلاپ وتىرعان بولارسىز؟

- ارينە، وليمپيادا ويىندارىنا قاتىسۋ جوسپارىمدا بار. سول جارىستا جاي عانا باق سىناپ قويماي، لوندونداعى كورسەتكىشىمدى قايتالاۋدى كوزدەيمىن.

- راقمەت! الداعى جارىستاردا سىزگە تابىس تىلەيمىز!

سۇحباتتاسقان عالىم سۇلەيمەن

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى