قازاقستاندا ۇلت ارالىق پروبلەما جوق - ە. توعجانوۆ - فوتو
بۇل تۋرالى بۇگىن قازاقستان حالقى اسسامبلەياسى ءتوراعاسىنىڭ ورىنباسارى - حاتشىلىق مەڭگەرۋشىسى ەرالى توعجانوۆ ايتتى.
«ءبىزدىڭ ەلىمىزدە ەتنوسارالىق پروبلەمانىڭ جوق ەكەندىگىن سىزدەرگە تاعى دا ءبىر مارتە باسا ايتقىم كەلەدى. ەتنوس ىشىندەگى كەيبىر ماسەلەلەردىڭ بولۋى دا مۇمكىن. ءبىراق ءبىز مۇنداي ماسەلەنى ەش ۋاقىتتا نازاردان تىس قالدىرمايمىز. ەتنوستاردىڭ ءوزارا قارىم-قاتىناسى ءبىزدىڭ كۇنتارتىبىمىزدەن تۇسكەن ەمەس. ءبىزدىڭ قىزمەتىمىزدە بۇل ماسەلە - بارلىق قوعامنىڭ كەلىسىمى ءار ۋاقىتتا دا باستى نازارىمىزدا بولادى»، - دەدى ە. توعجانوۆ ق ر پرەزيدەنتى جانىنداعى مەملەكەتتىك باسقارۋ اكادەمياسىندا وتكەن كەڭەس بارىسىندا.
ونىڭ سوزىنە قاراعاندا، ق ح ا ءوز جۇمىسى بارىسىندا ەلىمىزدەگى بارلىق ازاماتتىق قوعام ينستيتۋتتارىنىڭ شوعىرلانۋىن قامتاماسىز ەتەتىن بولادى.
«قوعامدىق كەلىسىم تەك قانا ەتنوستىق ماسەلەلەرگە قاتىستى ەمەس. ول ءبىرىنشى كەزەكتە ادامداردىڭ ءومىر ءسۇرۋ جاعدايىنا، ءاربىر قازاقستاندىقتىڭ كونستيتۋتسيالىق قۇقىعىنىڭ قامتاماسىز ەتىلۋىنە بايلانىستى بولۋى مۇمكىن»، - دەدى ول.
اۆتور: مارلان جيەمباي
