كوكشەتاۋ قالاسىنىڭ اكىمى جومارت نۇرعاليەۆ قايتىس بولدى

بۇل تۋرالى قالا اكىمىنىڭ قىزمەتكەرلەرى ءمالىم ەتتى.

ارىپتەستەرىنىڭ ايتۋىنشا، مارقۇم جومارت نۇرعاليەۆ كەشە كەشكىسىن قايتىس بولعان كورىنەدى. سول كۇنى كوكشەتاۋدا جەڭىستىڭ 70 جىلدىعىنا وراي شىعارماشىلىق ۇجىمداردىڭ وبلىستىق بايقاۋ- فەستيۆالى اياسىندا وتكەن گالا- كونسەرتكە قاتىسقان ول كەنەت جۇرەگى اۋىرىپ تۇرعانىن ايتىپ، ۇيىنە كەتىپ قالعان. كەيىن ۇيىنە جەدەل جاردەم كومەگىن شاقىرعان كورىنەدى. الايدا، دارىگەر اجالعا اراشا تۇسە المادى.

قازىرگى كەزدە مارقۇمنىڭ دەنەسىن تۋعان جەرى - قوستاناي وبلىسىنا جەتكىزۋ جۇمىسى قولعا الىندى.

ەسكە سالا كەتسەك، جومارت نۇرعاليەۆ اعىمداعى جىلدىڭ 5 - ماۋسىم كۇنى اقمولا وبلىسىنىڭ اكىمى سەرگەي كۋلاگيننىڭ وكىمىمەن كوكشەتاۋ قالاسىنىڭ جاڭا اكىمى بولىپ تاعايىندالعان ەدى. وكىنىشكە قاراي، مارقۇم بەس اي عانا كوكشەتاۋ قالاسىنىڭ اكىمى بولىپ قىزمەت ىستەدى. وسى از عانا ۋاقىتتىڭ ىشىندە قالانىڭ الەۋمەتتىك- ەكونوميكالىق دامۋىنا زور ۇلەس قوستى.

جومارت ميراس ۇلى نۇرعاليەۆ 1958 - جىلى تۋعان، قازاق، ءبىلىمى جوعارى، 1981 - جىلى قوستاناي پەداگوگيكا ينستيتۋتىن تاريح جانە قوعامتانۋ ماماندىعى بويىنشا بىتىرگەن. قوستاناي وبلىسىنىڭ كومسومول، پارتيا جانە مەملەكەتتىك ورگاندارىندا ءار ءتۇرلى باسشىلىق قىزمەتتە ىستەدى.

 2012 - جىلعى 13 - اقپاننان باستاپ 2014 - جىلدىڭ 5 - ماۋسىمىنا دەيىن قوستاناي وبلىسى اۋليەكول اۋدانىنىڭ اكىمى قىزمەتىن اتقاردى. ول «قۇرمەت» وردەنى، «قازاقستان رەسپۋبليكاسىنىڭ تاۋەلسىزدىگىنە 20 -جىل» مەرەيتويلىق مەدالدارىمەن ماراپتالعان. 2014 - جىلدىڭ 5 - ماۋسىمىنان باستاپ، ءومىرىنىڭ سوڭعى كۇنىنە دەيىن كوكشەتاۋ قالاسىنىڭ اكىمى قىزمەتىن اتقاردى.

اۆتور: اسلان وسپانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى