جۇرگىزۋشىلەر اراسىندا «جىندىلار» بار ەكەن
جول پوليتسياسى ورگاندارى مۇنداي ادامدارعا قاتىستى كولىك قۇرالدارىن جۇرگىزۋ قۇقىعىن شەكتەۋ بويىنشا جۇمىس جۇرگىزبەگەن.
پروكۋرورلىق تەكسەرۋدىڭ ناتيجەسىندە، جۇيكە اۋرۋلارىنا شالدىققان، سوتتىڭ شەشىمىمەن تۇرىپ جاتقان مەكەنجايى بويىنشا ەمدەلۋ شارالارى تاعايىندالعان ادامداردىڭ ازاماتتىق-قۇقىقتىق كەلىسىمدەر جاسايتىندىعى، ءوندىرىس ورىندارىندا جۇمىس ىستەيتىندىگى، ءتىپتى جوعارى قاۋىپ كوزى بولىپ سانالاتىن اۆتوكولىك قۇرالدارىن جۇرگىزەتىندىگى انىقتالدى.
پسيحيكالىق اۋىتقۋلار بولعان ادامداردىڭ كولىك جۇرگىزۋىنە قاتىستى 208 فاكتى انىقتالعان. جول پوليتسياسى ورگاندارى مۇنداي ادامدارعا قاتىستى كولىك قۇرالدارىن جۇرگىزۋ قۇقىعىن شەكتەۋ بويىنشا جۇمىس جۇرگىزبەگەن.
قازاقستان باس پروكۋراتۋراسىندا اسحات داۋىلبايەۆتىڭ باسشىلىعىمەن وتكەن كوللەگيا وتىرىسىندا قىلمىس جاساعاننان كەيىن پسيحيكالىق اۋرۋعا شالدىققان، مەديتسينالىق ماجبۇرلەۋ شارالارى قولدانىلعان. 2005 - جىلدان بەرگى سوت تاجىريبەلەرىنىڭ دەرەكتەرىنە جۇرگىزىلگەن تەكسەرۋ جۇمىستارىنىڭ قورىتىندىسى تالقىلاندى. كوللەگيانىڭ جۇمىسىنا جوعارعى سوتتىڭ، ىشكى ىستەر، دەنساۋلىق ساقتاۋ جانە الەۋمەتتىك دامۋ مينيسترلىكتەرىنىڭ وكىلدەرى، سونداي-اق بەينە بايلانىس ارقىلى وبلىستىق پروكۋرورلار قاتىستى.
جيىندا باس پروكۋرور قىلمىس جاساعاننان كەيىن اقىل-ەسىنەن اداسىپ، پسيحيكالىق دەرتكە دۋشار بولعان ادامداردىڭ قىلمىستىق جاۋاپكەرشىلىكتەن قۇتىلىپ كەتۋىنە جول بەرمەۋ ءۇشىن وسىنداي ساناتتاعى سوت اكتىلەرىنىڭ زاڭدىلىعىن قامتاماسىز ەتۋ وزەكتى ماسەلە بولىپ تابىلاتىنىن قاداپ ايتتى.
مۇنداي جاعدايدا قىلمىستىق ءىس ۋاقىتشا توقتاتىلادى، ءبىراق ارتىنان جازىلىپ شىققاننان كەيىن كىنالى ادامدار سوتتا جاۋاپ بەرۋى ءتيىس. مۇنداي ىستەر ماجبۇرلەپ ەمدەۋ توقتاتىلعاننان كەيىن قايتا جۇرگىزىلەدى.
الايدا تەكسەرۋ ناتيجەلەرىنە قاراعاندا، ءتيىستى جازاسىن بەرۋ ءپرينتسيپى كوپتەگەن جاعدايدا ورىندالمايدى ەكەن. سوت تاجىريبەسىن زەرتتەۋ بارىسىندا قىلمىس جاسادى دەپ ايىپتالعان ادامداردىڭ قىلمىستىق جاۋاپكەرشىلىكتەن جانە جازادان جالتارىپ كەتۋىنە اكەلەتىن ءبىرقاتار زاڭ بۇزۋشىلىقتار انىقتالعان. ماسەلەن، اۋرۋىنان ايىعىپ كەتكەنشە قىلمىستىق ءىستى توقتاتا تۇرۋدىڭ ورنىنا ايىپتالۋشىلار سوتتىڭ شەشىمىمەن ءماجبۇرلى ەمدەۋگە جىبەرىلىپ، قىلمىستىق جاۋاپكەرشىلىكتەن مۇلدە بوساتىلىپ وتىرعان.
قىلمىس جاساعاننان كەيىن پسيحيكالىق اۋرۋعا ۇشىراعان 35 ادامنىڭ 21 ى اۋىر قىلمىستارمەن، 9 ى اسا اۋىر قىلمىستارمەن ايىپتالعان. مۇنداي جاعدايلاردىڭ كوبى الماتى (8 ادام)، وڭتۇستىك قازاقستان (7) جانە الماتى (6) وبلىستارىندا بولعان. قىلمىستىق ىستەرىن قاراپ جاتقاندا اياق استىنان پسيحيكالىق اۋىتقۋلار پايدا بولعان 11 ايىپتالۋشى قىلمىس ىستەگەن كەزدە مەملەكەتتىك ورگانداردا ۇزاق ۋاقىت بويى لاۋازىمدى قىزمەتتەر اتقارعان. ولاردىڭ ىشىندە - ءۇش اكىم، ءۇش اسكەري قىزمەتكەر، ەكى باس دارىگەر، ەكى باس بۋحالتەر جانە ءبىر پويىز باستىعى بار. پسيحيكالىق اۋرۋعا شالدىققان ادامداردىڭ اۆتوكولىك رۋلىنە وتىرۋى بۇكىل كوشە قوزعالىسىنا قاتىسۋشىلار ءۇشىن وتە ءقاۋىپتى. زاڭ بويىنشا ونداي ادامداردى دەنساۋلىعىنا بايلانىستى كولىك جۇرگىزۋ قۇقىعىنان ايىرۋ تۋرالى جول پوليتسياسى انىقتاما جازىپ، سوتقا بەرۋى ءتيىس. پروكۋرورلاردىڭ ارالاسۋىمەن قازىر بۇل ماسەلە قولعا الىنىپ، 115 ادامنىڭ كولىك قۇرالدارىن جۇرگىزۋ قۇقىنان ايىرۋ جونىندە سوتقا ارىز ءتۇسىرىلدى، قازىرگى كەزدە ونىڭ 61 ى ورىندالىپتى.
جيىندى قورىتىندىلاعان باس پروكۋرور اتالعان ساناتتاعى انىقتالعان سوتتاردىڭ جىبەرگەن زاڭ بۇزۋشىلىقتارى جونىندە اقپارات بەرۋدى جوعارعى سوتقا تاپسىردى. دەنساۋلىق ساقتاۋ مەكەمەلەرىنىڭ مۇنداي ادامدارعا، اسىرەسە، كوررۋپتسيالىق قىلمىستار بويىنشا ىستەرمەن جاۋاپقا الىنعان ادامدارعا ماجبۇرلەپ ەمدەۋ مەرزىمىن ۇزارتۋ تۋرالى انىقتامالارىنىڭ نەگىزدەلۋىن مۇقيات تەكسەرۋ قاجەتتىلىگىنە نازار اۋدارىلاتىن بولدى.
ىشكى ىستەر مينيسترلىگىنە جۇيكە اۋرۋىنا شالدىققان ازاماتتاردى كولىك قۇرالىن باسقارۋ قۇقىعىنان ايىرۋعا ءتيىمدى شارالار قابىلداۋ، سونداي- اق جۇيكە اۋرۋلارىمەن سىرقاتتانعان ادامداردىڭ قوعامدىق ءقاۋىپتى ارەكەتتەرىن ۋاقتىلى ەسكەرتۋ ماقساتىندا دەنساۋلىق ساقتاۋ مەكەمەلەرىمەن ءوزارا تىعىز ءىس-قيمىل جاساسۋدى قامتاماسىز ەتۋ ۇسىنىلدى.
«ايقىن»
