رەسەي ازاماتتارى تاراپىنان ورىن الۋى مۇمكىن ارانداتۋشىلىق ارەكەتتەر باقىلاۋدا بولادى - ىشكى ىستەر ءمينيسترى

ەسكە سالايىق، «قازاقستان رەسپۋبليكاسى مەن رەسەي فەدەراتسياسى اراسىنداعى قازاقستان رەسپۋبليكاسى ازاماتتارىنىڭ رەسەي فەدەراتسياسىنىڭ اۋماعىندا جانە رەسەي فەدەراتسياسى ازاماتتارىنىڭ قازاقستان رەسپۋبليكاسىنىڭ اۋماعىندا بولۋ ءتارتىبى تۋرالى كەلىسىمدى راتيفيكاتسيالاۋ تۋرالى» زاڭ قابىلدانعان بولاتىن.

«اعىمداعى جىلدىڭ 9- ايىندا قازاقستانعا 3 ميلليون 435 مىڭ رەسەي ازاماتتارى كەلدى. وتكەن جىلى رەسەيدەن كەلگەندەر شامامەن 3 ميلليون ادامدى قۇراعان. ولاردىڭ 4 پايىزى تىركەۋدەن وتپەگەن. تاجىريبە كورسەتكەنىندەي، قازىرگى تاڭدا رەسەيلىك ازاماتتار تەك 30 كۇنگە عانا كەلەدى. قازىرگى تاڭدا بىزدە وسى باعىتتا اكىمشىلىك جاۋاپكەرشىلىككە تارتىلعان ازاماتتار 2 پايىزعا كەمىدى»، - دەدى ىشكى ىستەر ءمينيسترى.
 


ونىڭ ايتۋىنشا، اعىمداعى جىلدىڭ 9,5 ايىندا قازاقستان رەسپۋبليكاسى اۋماعىندا بولۋ ەرەجەسىن بۇزعانى ءۇشىن 288 رەسەيلىك ازامات اكىمشىلىك جاۋاپكەرشىلىككە تارتىلعان بولسا، بىلتىرعى جىلدىڭ وسى كەزەڭىندە جاۋاپقا تارتىلعاندار سانى 581 ادامدى قۇراعان.

 «رەسەي ازاماتتارى تاراپىنان سەپاراتيزمگە ۇگىتتەۋ مەن ارانداتۋشىلىق ارەكەتتەردىڭ ورىن الۋ مۇمكىندىگىنە قاتىستى ايتار بولساق، ىشكى ىستەر مينيسترلىگى جاعدايدى باقىلاپ وتىر»، - دەدى دەپۋتاتتار سۇراعىنا جاۋاپ بەرگەن ق. قاسىموۆ.

اۆتور: قانات مامەتقازى ۇلى

* * *

سەپاراتيزم - جىكشىلدىك، وڭاشالانۋعا تىرىسۋشىلىق. حالىقتىڭ مەملەكەتتەن ءبولىنۋ ارەكەتى سەپاراتيزم دەپ تۇسىندىرىلەدى.

 كوپ ۇلتتى مەملەكەتتەردەگى از ۇلتتىڭ وكىلدەرى الدىنا بولەك مەملەكەت بولىپ ءبولىنىپ شىعۋعا نەمەسە اۆتونوميا الۋعا ۇمتىلادى. ۇلت- ازاتتىق قوزعالىستان ەرەكشەلىگى - ونىڭ جالپى حالىقتىق، بۇقارالىق سيپاتى بولمايدى، ول ۇلتتىڭ ءبىر بولىگىنىڭ مۇددەسىن قامتيدى.

سەپاراتيزم تەرريتوريالىق قاقتىعىستىڭ تۋدىراتىن بىردەن ءبىر فاكتور بولىپ تابىلادى. سەپاراتيزم - بەلگىلى ءبىر ساياسي توپتاردىڭ وزدەرى ءومىر ءسۇرىپ وتىرعان مەملەكەتتەن جەكە مەملەكەت رەتىندە ءبولىنىپ شىعۋعا نەمەسە سول مەملەكەتكە تيەسىلى تەرريتوريانى باسقا ءبىر مەملەكەتكە قوسۋعا ۇمتىلۋشىلىعى. جىكشىلدىك حالىقتىڭ جاپپاي بۇقارالىق قوزعالىسى بولماعاندىقتان ونى ۇلت- ازاتتىق كوتەرىلىستەردىڭ قاتارىنا جاتقىزۋعا بولمايدى.

جىكشىلدىك، نەگىزىنەن، مەملەكەت ىشىندەگى ساياسي تۇراقسىزدىق پەن الاۋىزدىق (ۇلتتىق كەمسىتۋشىلىك، از ۇلتتاردىڭ ازاماتتىق قۇقىقتارىن شەكتەۋ، ت. ب. ) جاعدايىندا پايدا بولادى. سونداي- اق، وزگە مەملەكەتتەردىڭ استىرتىن ساياساتى سالدارىنان دا تۋىندايدى. جىكشىلدىك سالدارى مەملەكەت ىشىندە ازامات سوعىسى باستالۋ قاۋپىن تۋعىزادى جانە مەملەكەتتىك توڭكەرىس پەن بولىنىسكە دەيىن سوقتىرۋى ىقتيمال.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى