قىرعىزستاندا كوكپاردىڭ سوڭى كىسى ولىمىنە الىپ كەلدى

 جەرگىلىكتى "ازاتتىق" راديوسىنىڭ حابارلاۋىنشا، وقيعا ەلدىڭ وڭتۇستىگىندەگى ەلدىمەكەندەردىڭ بىرىندە ورىن العان. اۋىل تۇرعىنى اتاسىنا اس بەرىپ، كوكپار ۇيىمداستىرعان كورىنەدى. ويىن بىتكەننەن كەيىن ايتيەۆتەر مەن قارابەكوۆتەر وتباسى كوكپاردىڭ سەركەسىنە تالاسىپ، ونىڭ سوڭى توبەلەسكە ۇلاسىپتى.

پوليتسيا وكىلدەرىنىڭ ايتۋىنشا، جانجالعا ايتيەۆتەردىڭ ءۇش بالاسى مەن ءبىر دوسى جانە قارابەكوۆتەردىڭ ەكى بالاسى قاتىسقان.

"اشۋعا بۋلىققان ايتيەۆتەر ۇسەندى سوققىعا جىعىپ، ونى پىشاقتاپ تاستاعان. ايتۋلارىنشا، ول الگىلەردىڭ نامىسىن تاپتاعان كورىنەدى. مۇنان كەيىن ۇسەننىڭ ەكى اعايىنى باۋىرى ءۇشىن كەك الماق بولىپ، ايتيەۆتەرمەن توبەلەسكەن. دەگەنمەن، ولار دا سوققىعا جىعىلدى. قيالبەك قارابەكوۆتىڭ باسى جارىلىپ، ول وقيعا ورنىندا تىلگە كەلمەي قايتىس بولدى" دەيدى قاندى وقيعاعا كۋا بولعان جەرگىلىكتى تۇرعىندار.

 وسى جايتقا بايلانىستى قازىر ايتيەۆتەر وتباسىنىڭ ءۇش مۇشەسى قاماۋعا الىنىپ، ولاردىڭ ۇستىنەن قىلمىستىق ءىس قوزعالدى. ال، تۋعانىنان ايرىلعان قارابەكوۆتەر جانازادان كەيىن ايىپتىلاردىڭ ءۇيىن ورتەپ جىبەرمەك بولعان ەكەن. الايدا، اۋىل اقساقالدارى اراعا ءتۇسىپ، ولارعا توقتاۋ سالعان.

baq.kz 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى