ەلىمىزدە ۇلتتىق مارتەبە بەرىلگەن بىردە- ءبىر تەاتر جوق

«تاۋەلسىز مەملەكەتتەر دوستاستىعىندا قىرىقتان استام ۇلتتىق ستاتۋسى بار تەاترلار جۇمىس جاساۋدا. ارينە، مارتەبەسىنە قاراي جاعدايى دا وزگەشە، جالاقىسى دا ماردىمدى. وزبەكستاندا 3، قىرعىزستاندا 2، تۇرىكمەنستاندا 4 تەاتر، ال بىزدە بىردە- ءبىر ۇلتتىق مارتەبەسى بار تەاتر جوق. ءبىر تەاتر بار ەدى -  كۇلاش بايسەيىتوۆا اتىنداعى وپەرا جانە بالەت تەاترى، ول دا جابىلدى. سوندا بۇل قالاي دەگەن وي كەلەدى. مىسالى، اۋەزوۆ تەاترى پەن اباي اتىنداعى وپەرا تەاترىنىڭ قۇرىلعانىنا بيىل 80-90  جىل تولىپ وتىر. ۇلتتىق دەگەن ستاتۋسقا وسى كۇنگە دەيىن يە بولا الماي كەلە جاتقانىمىز تۇسىنىكسىز. قانشا رەت كوتەردىك، ءبىراق شەشىمىن تاپپادى»، - دەدى ەسمۇحان نەسىپباي ۇلى.

پروفەسسور، سونداي-اق، رەجيسسەرلەردى دايىنداۋ ماسەلەسىن دە كوتەردى. ونىڭ ايتۋىنشا، بۇل ماسەلە كەزەك كۇتتىرمەيدى.

«نەگە «بولاشاق» باعدارلاماسى ارقىلى قازاق رەجيسسەرلەرىن شەتەلدە دايىنداۋعا كۆوتا بولىنبەيدى؟ نەگە ستاجيروۆكاعا جىبەرىلمەيدى؟ بۇرىن ماسكەۋ مەكتەبىندە تالاي ونەر جەتەكشىلەرى دايىندالعان ەدى. بۇگىندە وسىلاردىڭ ءبارى جوق، بولسا دا تىم از. بۇل قاراجاتتىڭ جوقتىعىنان شىعار دەپ ويلايمىن. بۇكىل قازاق تەاترلارىنىڭ تەحنيكالىق قاجەتتىلىكتەرىن وتەۋ دە ۋاقىت كۇتتىرمەيتىن نارسە. بارلىق تەاترلاردا جارىق، دىبىس، توزىعى جەتكەن اكۋستيكانى اۋىستىرۋ كەرەك، بۇگىنگى كۇن تالابىنا ساي كەلەتىن قۇرالدارمەن جابدىقتاۋ قاجەت دەپ ەسەپتەيمىن»، - دەپ تولىقتىردى حالىق ءارتىسى.

پروفەسسور اتاپ وتكەندەي، وبلىستىق تەاترلار بۇگىندە ءوز كۇنىن ءوزى كورىپ جاتىر.

«جىلىنا جۇزدەن استام ونەر ماماندارىن دايىندايمىز. ولار ديپلومدارىن قالتاسىنا قونجيتىپ، بار قارۋىن اسىنىپ، وبلىستىڭ ونەر وشاقتارىنا اتتانادى. جەتە سالا، تاۋى شاعىلادى. نەگىزگى سەبەبى -  ماردىمسىز جالاقى، ماعىناسىز تىرلىك، ءۇي جوق، سودان ءۇمىتى ۇزىلگەن جاس مامان جىل وتپەي جاتىپ قاشا باستايدى.

بۇل پروبلەما، بۇل ىندەت. ونەر تەك استانا مەن الماتىدا عانا دەسەك قاتەلەسەمىز. بۇگىندە نەبىر ءدۇلدۇل تەاترلار بار. كەيىنگى كەزدە مادەنيەت مينيسترلىگى كوپ شارالار اتقارىپ جاتىر، ونى جوققا شىعارۋعا بولمايدى. ايتسە دە، شەشىمىن تاپپاعان شارالار شاش ەتەكتەن دەپ ويلايمىن»، - دەدى ە. وبايەۆ.

 پروفەسسور دەپۋتاتتاردىڭ نازارىن تاعى ءبار ماسەلەگە اۋدارعاندى ءجون كوردى.

«جاقىندا جاعا ۇستاتقان سولاقاي سوراقىلىق بەلگىلى بولدى. الماتى قالاسىنىڭ مادەنيەت باسقارماسى الماتىداعى قىرىقتان استام تەاتر، مۋزەي، كىتاپحانا، كينو جانە كونسەرت زالدارىنىڭ عيماراتتارىن جەكەشەلەندىرىپ، مادەنيەت كوميتەتىنىڭ قاراۋىنا بەرۋدى پرەمەر- مينيستر كەڭسەسىنە ۇسىندى. ولاردىڭ كوبى تاريحي مۇرا سانالادى، مارتەبەسى بار مەملەكەتتىك عيماراتتار عوي. بۇل سۋىق حابار ونەر وشاقتارىنداعى ادامدار اراسىندا زوبالاڭ تۋدىرۋدا»، - دەپ جەتكىزدى ول.

ايىمگۇل ابىلەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى