قارقارالى اكىمىنىڭ بالاسى كىسى ولتىرۋگە ارەكەتتەنگەنى ءۇشىن ۇستالدى
قارقارالى اكىمدىگىنىڭ كادر ءبولىمى ماماندارى اكىمنىڭ شۇعىل تۇردە ءوز قارجىسىنا دەمالىسقا شىققانىن حابارلادى. «بۇل ونىڭ بالاسىنىڭ ۇستالۋىمەن بايلانىستى، وعان ادامعا قاستاندىق جاسادى جانە اۆتوكولىكتى جويدى دەگەن كۇدىك كەلىپ وتىر»، - دەپ حابارلادى كادر ءبولىمى قىزمەتكەرلەرى.
ايتا كەتەيىك، وقيعا قارقارالىنىڭ جانارماي قۇيۋ بەكەتى اۋماعىندا بولدى. اكىمنىڭ جانارماي بەكەتىنىڭ ماڭىنان ءوتىپ بارا جاتقان 23 جاستاعى بالاسى مەن ونىڭ جۇمىسسىز دوسى جانارماي قۇيىپ جاتقان ۆاز-21014 اۆتوكولىك يەسىنە جاقىنداپ كەلىپ، جانجال شىعارعان. «ۇرىس توبەلەسكە ۇلاستى. ءبىزدىڭ تۋىسقانىمىزدىڭ باسىن دومكراتپەن ۇرىپ-سوقتى. ول ەسىنەن تانىپ قالعان كەزدە ونى ولتىردىك دەپ ويلادى. ونى كولىك باگاجىنا سالىپ، تاۋلى-ورماندى القاپقا اپارىپ، شەشىندىرىپ، ورمانعا تاستاعان»، - دەيدى اۆتوكولىك ەگەسىنىڭ تۋىسقاندارى.
جابىرلەنۋشىنىڭ اۆتوكولىگى ورماندا ورتەنگەن. ەسىن جيناعان جالاڭاش ەر ادام قالا شەتىندەگى تراسساعا شىعىپ، كولىك توقتاتا العان. كولىك يەسى ونى كوپتەگەن دەنە جاراقىتىمەن قالالىق اۋرۋحاناعا جەتكىزەدى.
قارقارالى اۋداندىق قىلمىستىق ءىس تەكسەرۋ پوليتسياسىنىڭ قىزمەتكەرلەرى كۇدىكتىلەردى ۇستادى. ولاردىڭ ءبىرى بۇعان دەيىن ادام دەنساۋلىعىنا قاساقانا زيان كەلتىرۋ بويىنشا قىلمىستىق جاۋاپكەرشىلىككە تارتىلعان. ال اكىمنىڭ بالاسى اتىس قارۋىن ساقتاعانى ءۇشىن جاۋاپقا تارتىلدى، ۇستالعاندارعا قاتىستى ق ر ق ك 24-96- بابى - «كىسى ولتىرۋگە قاستاندىق جاساۋ» بويىنشا قىلمىستىق ءىس قوزعالدى.
