پارا بوپسالادى دەگەن كۇدىكپەن ۇستالعان بايقاۋ ۇيىمداستىرۋشىسىنان جاۋاپ الىندى

ورالدا سۇلۋلىق بايقاۋى اينالاسىنداعى كەزەكتى جانجال تاعى باستالدى.

پوليتسەيلەر مۇندا «ورال ارۋى-2013» بايقاۋىنىڭ ۇيىمداستىرۋشىسى الماز كاچيەۆتى ۇستاعان ەدى. بەلگىلى بولعانداي، اتىراۋ تۇرعىنى الماز فايزۋللين قىزى نازەركە فايزۋللينانى «قازاقستان ارۋى-2013» سۇلۋلىق بايقاۋىندا جەڭىسكە جەتكىزۋ ءۇشىن كاچيەۆتىڭ 20 مىڭ دوللار تالاپ ەتكەنىن ايتىپ، پوليتسياعا شاعىم تۇسىرگەن.

28 - قازان كۇنى الماز كاچيەۆ ورال قالاسىندا ۇستالدى. بالالارعا جانە ەرەسەكتەرگە ارنالعان بايقاۋلاردىڭ ۇيىمداستىرۋشىسى اباي پوليتسيا بولىمىنە جەتكىزىلدى. وسى وقيعادان كەيىن ۇيىمداستىرۋشىنىڭ جۇبايى ديانا جۋرناليستەرگە سۇحبات بەردى.

«ءبىر جىل بويى ىزىمىزگە ءتۇستى. جۇمىس ىستەۋگە مۇرشا بەرمەدى. بالالارىمدى ۇرلاۋعا ارەكەتتەندى، اتىراۋداعى كەڭسەمىز تونالدى. مەنىڭ جانە كۇيەۋىمنىڭ اتىنا كىر كەلدى. فايزۋلليندەر وتباسى قىزدارىنىڭ «قازاقستان ارۋىندا» جەڭىمپاز اتانۋىن تالاپ ەتتى. ەگەر ولاي بولماعان جاعدايدا ىسكەرلىك ابىروي-بەدەلىمىزگە نۇقسان كەلتىرەتىندەرىن ايتتى»، - دەيدى سۇلۋلىق بايقاۋىنىڭ ۇيىمداستىرۋشىسى ديانا كاچيەۆا.

بارلىعى 17 جاسار نازەركە فايزۋللينانىڭ ايىپتاۋلارىنان باستالعان. «اتىراۋ ارۋى-2013» بايقاۋىنىڭ جەڭىمپازى ۇلتتىق سۇلۋلىق بايقاۋىنداعى اتاق ساتىلادى دەپ مالىمدەمە جاساعان ەدى. جۇلدەگەرلەردىڭ ۇشتىگىنە ەنۋ ءۇشىن ودان 20 مىڭ دوللار تالاپ ەتىلىپتى. الايدا كاچيەۆتەر وزدەرىنە تاعىلعان ايىپتاۋلاردى جوققا شىعارىپ شىر-پىر بولۋدا.

قازىر ديانا مەن الماز كاچيەۆتەر اتىراۋدا، ولارمەن تەرگەۋ ارەكەتتەرى وتكىزىلىپ جاتىر.

«مەنەن اتىراۋدا جاۋاپ الىندى. ماعان ايىپ تاعىلعان جوق جانە مەنى ۇستاعان دا جوق. ءبىز قازىر مەنىڭ قورعاۋشىممەن بىرگە جاۋاپ الۋدامىز. نازەركە فايزۋللينانىڭ اكەسى مەنىڭ ودان 3 ميلليون تەڭگە قارىز الىپ، بەرمەي جۇرگەنىمدى ايتقان»، -  دەيدى تەلەفون ارقىلى سويلەسۋ كەزىندە الماز كاچيەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى