پاۆلودارلىق تۋريستىك كومپانيانىڭ باسشىسى ءۇش جىلعا سوتتالدى

ول مەرزىمىن جالپى رەجيمدەگى كولونيادا وتەيتىن بولادى.

تۋرفيرما ديرەكتورى لاۋازىمىنداعى 48 جاستاعى ايەل 2013 - جىلى كليەنتتەرمەن تۋريستىك ساپارلاردى ۇيىمداستىرۋ تۋرالى جالعان كەلىسىمشارتتار جاساسىپ، ولارعا جالعان چەك بەرىپ وتىرعان.

پاۆلودار قالاسى پروكۋرورىنىڭ كومەكشىسى ەلەنا بەلوۆانىڭ ايتۋىنشا، كليەنتتەر جولدامالارىنىڭ قۇنىن تولىعىمەن تولەگەن. تۋريستىك ساپارعا ءبىر اپتا مەرزىم قالعاندا اتالمىش باسشى تۋروپەراتوردىڭ كىناسىنەن نەمەسە ۆيزالارمەن ماسەلە تۋىنداعاندىقتان، بۇل ساپاردىڭ بولمايتىنى تۋرالى ايتىپ وتىرعان. الايدا كليەنتتەرىنىڭ قاراجاتىن قايتارماعان.

شەتەلدە دەمالامىن دەپ الاياق ايەلگە الدانىپ، ءجۇز مىڭداعان قاراجاتتارىنان ايىرىلىپ قالعاندار قۇقىق قورعاۋ ورگاندارىنا شاعىمدانعان.

تەكسەرۋ بارىسىندا تۋرفيرما باسشىسىنىڭ جالعان ءىس-ارەكەتتەرى انىقتالدى، ياعني ول ەشقانداي ۇشاققا بيلەتتەر ساتىپ الماعان، قوناقۇيلەردى برونداماعان، ول ءۇشىن قاجەتتى سومالاردى ەسەپشوتتارعا اۋدارماعان.

وعان قاتىستى ق ر قىلمىستىق كودەكسىنىڭ 177-بابىنىڭ 3- تارماعى بويىنشا ايىپ تاعىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى