يسلام ىنتىماقتاستىق ۇيىمىنىڭ باس حاتشىسى قازاق ۇلتتىق ۋنيۆەرسيتەتىندە ءدارىس وقىدى

وعان ۋنيۆەرسيتەتتىڭ وقىتۋشى قاۋىمى مەن شىعىس تانۋ، حالىقارالىق قاتىناستار جانە جۋرناليستيكا فاكۋلتەتتەرىنىڭ جۋرناليستەرى قاتىستى.

ءدارىس باستالار الدىندا ۋنيۆەرسيتەت رەكتورى، تەحنيكا عىلىمدارىنىڭ دوكتورى، پروفەسسور عالىمقايىر مۇتانوۆ قاز ۇ ۋ-دىڭ يسلام الەمىنىڭ جوعارى وقۋ ورىندارىمەن اراداعى ىنتىماقتاستىقتى كەڭەيتىپ، ودان ءارى دامىتۋعا كۇش سالىپ جاتقاندىعىن جەتكىزدى.

«بۇگىنگى تاڭدا ۋنيۆەرسيتەتتە تاياۋ شىعىس ەلدەرىمەن ىنتىماقتاستىق ورناتۋ جۇمىستارى قارقىندى جۇرۋدە. وتكەن جىلى ءبىز يوردانيانىڭ عىلىم جانە تەحنولوگيا ۋنيۆەرسيتەتىمەن عىلىم جانە ءبىلىم سالاسىندا ىنتىماقتاسۋ جونىندە ورتاق كەلىسىمگە كەلىپ، سول ۋنيۆەرسيتەتتە «ءال- فارابي» عىلىمي-ءبىلىم جانە مادەنيەت ورتالىعىن اشتىق. ەندى تاياۋ بولاشاقتا تۇركيا ەلىندە دە وسىنداي ورتالىق اشۋدى جوسپارلاپ وتىرمىز» - دەدى ءوز سوزىندە ع. مۇتانوۆ.

سونىمەن قاتار، عالىمقايىر مۇتانوۆ شىعىستىڭ ۇلى عالىمى جانە ويشىلىنىڭ ەسىمىمەن اتالعان ۋنيۆەرسيتەت ۇجىمى وزىنە جۇكتەلگەن جاۋاپكەرشىلىكتەردى جاقسى تۇسىنەتىندىگىن اتاپ ءوتتى.

«ءبىزدىڭ ۋنيۆەرسيتەت شىعىس تانۋشى- ديپلوماتتاردى دايارلاۋ بويىنشا ەلىمىزدەگى بازالىق جوعارى ورنى بولىپ تابىلادى. سوندىقتان دا ءبىز بۇكىل يسلام الەمىمەن اراداعى رۋحاني جانە مادەني بايلانىستى جاقسى سەزىنەمىز. جانە وسى بايلانىستىڭ نىعايا تۇسۋىنە مۇددەلىمىز» - دەدى ع. مۇتانوۆ.

وسىدان كەيىن، ءسوز العان يسلام ىنتىماقتاستىق ۇيىمىنىڭ باس حاتشىسى ياد بەن امين ماداني قازاق حالقىنىڭ قوناقجايلىعىنا ريزاشىلىعىن بىلدىرە وتىرىپ، اشىق دارىسكە جينالعاندارعا اتالمىش ۇيىمنىڭ تاريحى مەن حالىقارالىق ارەنادا الاتىن ورنى جونىندە بايانداما جاسادى.

اشىق ءدارىس ودان ءارى جالعاسۋدا.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى