ەلىمىزدەگى بوكس مەكتەبىنىڭ اتاسى - شوقىر بولتەك ۇلى
1916 - جىلى 29 - قازان كۇنى ماڭعىستاۋ وبلىسى، جارمىش اۋىلىندا دۇنيەگە كەلگەن.
ⅩⅩ عاسىردىڭ قىرقىنشى جىلدارى وسىناۋ سپورتتىڭ قاناتىن قاقتىرعاندا شوقىر بولتەك ۇلى ەدى. ول سپورتقا كەلمەس بۇرىن كيەۆتەگى كوركەمسۋرەت اكادەمياسىن جانە دەنە تاربيەسى ينستيتۋتىن بىتىرەدى.
ەكىنشى دۇنيەجۇزىلىك سوعىسقا قاتىسىپ، 1944 - جىلى جاراقاتتانىپ ەلگە ورالادى. شوقىر بولتەك ۇلى رينگتە 223 كەزدەسۋ وتكىزىپ، ونىڭ 199- ىندا جەڭىسكە جەتكەن. 50- جىلدارى قازاق س س ر-ىنىڭ 3 رەت چەمپيونى اتانادى.
اناسى قايىقتا بوسانىپ، اتىن شوقىر دەپ قويعان. شوقىر بۇل بالىقتىڭ اتى. كەزىندە باۋىرجان مومىش ۇلىنىڭ ءوزى: «ەكى-اق ناعىز قازاق بار: ءبىرى - مەن، ءبىرى - شوقىر»، - دەگەن ەكەن. قىلىشىنان قان تامىپ تۇرعان 40- جىلدارى ءوز تەگىن «ۇلى» دەپ جازدىرعان تۇڭعىش قازاق - شوقىر بولتەك ۇلى.
ك س ر و سپورت شەبەرى اتانعان العاشقى قازاق تا وسى شوقىر اتامىز. الماتىنىڭ كوشەسىندە جىگىتتەرىمەن بىرگە شوق اتامىز كەلە جاتقاندا ءبارى قوعاداي جاپىرىلا جول بەرەدى ەكەن. سول كەزدەرى شوقىر اتامىزدىڭ بەدەلى قازىرگى الەمدىك انشىلەردەن بيىك بولماسا كەم بولعان جوق دەيدى بەلگىلى سپورت جۋرناليسى قىدىربەك رىسبەك.
شارشى الاڭنىڭ شاڭىن قاققان بوكسشى ءىزباسار شاكىرت تاربيەلەپ، بوكسقا باۋلۋ ءۇشىن الاقانداي الاڭ ىزدەپ، وپەرا جانە بالەت تەاترىنىڭ ءبىر بولمەسىن سۇراپ الادى. 1937 - جىلى شوقىر بولتەك ۇلىنىڭ باسشىلىعىمەن بوكستان الماتى قالاسىنىڭ رەسمي بىرىنشىلىگى ءوتتى. وعان 50 سپورتشى قاتىسقان. 1947 - جىلى ماسكەۋدە وتكەن كەڭەستەر وداعىنىڭ بىرىنشىلىگىنە قازاق ەلىنىڭ قۇراما كومانداسىن شوقىر اتامىز باستاپ باردى. ونىڭ مەكتەبىنەن ماقسۇت وماروۆ، ءابدىسالان نۇرماحانوۆ، سەرىك ابدىناليەۆ، ۆيكتور جانە ۆلاديمير كاريموۆتار، اسقار ق ۇلىبايەۆ سەكىلدى تالانتتى شاكىرتتەر تاربيەلەنىپ شىقتى. ونىڭ قاراپايىمدىلىعىندا شەك جوق بولاتىن. ك س ر و مەن ا ق ش اراسىنداعى ماتچتىق كەزدەسۋدە جوعارى قاباتقا شوقىر اعامىزعا قازىرگى تىلمەن ايتاقان VIP ورىن دايىندالدى.
ءبارى شوقىر قايدا دەپ ىزدەپ جاتتى. ءبىراق شوق اعامىز تريبۋنادا كورەرمەندەرمەن قاتار وتىردى. وسىنىڭ ءوزى ونىڭ شەكسىز قاراپايىمدىلىعى ەدى دەيدى قاسىم سىرباي ۇلى.
شوقىر بولتەك ۇلىنىڭ زايىبى قازاق ك س ر-نىڭ ەڭبەك سىڭىرگەن ءارتىسى، قازاقتىڭ تۇڭعىش بالەرينا-ءبيشىسى نۇرسۇلۋ تاپالوۆا.
ەكەۋى الماتىداعى ءۇش قاباتتى ارتىستەر ءۇيىنىڭ ءبىر بولمەلى پاتەرىندە قوڭىرقاي عانا تىرلىك كەشتى. كەڭ ءۇي سۇراپ، بىرەۋدىڭ الدىنا بارۋدى ار ساناپتى. شىعىستىڭ زارەماسى اتانعان نۇرسۇلۋعا ءان ارناعان سازگەر دە، شوقىرمەن ەلىنىڭ شوقتىعىن كوتەرگەن اقىن دا، ءبارى-ءبارى وسى ءبىر بولمەلى پاتەردىڭ تۇراقتى قوناقتارى ەدى. شوقىر بولتەك ۇلى 1994 - جىلى 78 جاسىندا دۇنيەدەن وزدى.
ارادا 4 جىل وتكەندە زايىبى نۇرسۇلۋ ەلۋباي قىزى دا قايتپاس ساپارعا اتتاندى.
ءبىرى قازاقتىڭ تۇڭعىش بوكسشىسى، ءبىرى تۇڭعىش كاسىبي بالەت ءبيشىسى، ءبىرى تۇڭعىش سپورت شەبەرى، ءبىرى قازاق س س ر-نىڭ ەڭبەك سىڭىرگەن ءارتىسى، ءبىرى قازاق- س س ر-نىڭ ەڭبەك سىڭىرگەن جاتتىقتىرۋشىسى، «قوس تۇڭعىش» تۋعان ەلىنىڭ توپىراعىندا بايىز تاپتى. ەكەۋى دە كەڭسايدا جەرلەنگەن.
Baq.kz
