الماتىدا «قالتا قاعىپ» جۇرگەن سۇعاناق ايەل ۇستالدى
قاسكۇنەم ءوزىنىڭ زاڭسىز ارەكەتىن الماتى وبلىسى قاراساي اۋدانى اۋماعىنداعى ءىرى بازارلاردا جۇزەگە اسىرىپ كەلگەن. ول جابىرلەنۋشىلەردىڭ سومكەسىنە قول سۇعىپ قانا قويماي، اتالعان بازاردىڭ ساۋدا نۇكتەلەرىنىڭ بىرىنە باسا-كوكتەپ كىرىپ، ساتۋشى ايەلدىڭ تابىسىن يەمدەنىپ العان. جابىرلەنۋشىلەردىڭ ارىزىنا سايكەس، كەلتىرىلگەن شىعىن كولەمى 150 مىڭ تەڭگەدەن اسادى.
«102» قىزمەتىنە تۇسكەن حابارلاما بويىنشا، الماتى وبلىسىنىڭ ءتارتىپ ساقشىلارى دەرەۋ ءتيىستى شارالارعا كىرىسىپ، جەدەل ىزدەستىرۋ شارالارى بارىسىندا 30 جاستاعى تاراز تۇرعىنى ۇستالدى.
قالتاعا ءتۇسۋ قاسكۇنەمنىڭ ۇيرەنشىكتى ادەتىنە اينالعان. ءتارتىپ ساقشىلارىنىڭ ايتۋىنشا، سۇعاناق ايەلدەن زارداپ شەككەندەر سانى بۇدان دا كوپ بولۋى مۇمكىن. قازىر ونىڭ وسىعان ۇقساس باسقا قىلمىستارعا قاتىسى بار-جوعى انىقتالىپ جاتىر.
