قازاقستان كوشباسشىسىنىڭ يسلام الەمى مەن باتىستى، باتىس پەن يسلام الەمىن جاقىنداستىرۋعا سىڭىرگەن ۇلەسى زور - يۋ. كۋچينسكايا
«ارينە، بۇل سىيلىقتىڭ تابىس ەتىلۋى ءبىزدىڭ مەملەكەت باسشىسىنىڭ يسلام الەمى الدىنداعى قىزمەتىنىڭ مويىندالۋى دەگەن ءسوز. مەنىڭشە، ءبىزدىڭ پرەزيدەنت باتىس پەن شىعىستىڭ قارىم-قاتىناسىن جولعا قويۋعا، شىندىعىن ايتقاندا، يسلام الەمى مەن باتىستى، باتىس پەن يسلام الەمىن ءبىر-بىرىمەن جاقىنداستىرۋعا تىكەلەي زور ەڭبەك ءسىڭىرىپ كەلەدى»، - دەدى ول.
يۋ. كۋچينسكايانىڭ اتاپ وتۋىنشە، سوڭعى ۋاقىتتا الەمدە، ونىڭ ىشىندە يسلام ەلدەرىندە ورىن العان سوڭعى وقيعالاردى ەسكەرەر بولساق، ەلباسىنىڭ «يسلامدىق قارجى بويىنشا جاھاندىق كوشباسشى» سىيلىعىن يەلەنۋى يسلام الەمىنىڭ وڭ ءيمميدجىن قالىپتاستىرۋدا زور ماڭىزعا يە.
«ءبىزدىڭ پرەزيدەنتىمىز كوپتەگەن ءىس اتقارۋدا. ءتىپتى، ءبىزدىڭ ەلىمىز دۇنيەجۇزىلىك يسلام ەكونوميكالىق فورۋمىنا ءبىزدىڭ ەل ءتوراعالىق جاساعان كەزەڭدە دە ءبىراز جۇمىستىڭ اتقارىلعانى بەلگىلى»، - دەدى قاۋىمداستىق ديرەكتورى.
ەستەرىڭىزگە سالا كەتەيىك، بۇگىن دۋبايدا ق ر پرەزيدەنتى نۇرسۇلتان نازاربايەۆقا «يسلامدىق قارجى بويىنشا جاھاندىق كوشباسشى» سىيلىعى سالتاناتتى تۇردە تابىس ەتىلدى. ويتكەنى، سىيلىق بەرۋ جونىندەگى كوميسسيا قازاقستان كوشباسشىسىنىڭ يسلامدىق قارجىلاندىرۋدى العا جىلجىتۋداعى قىزمەتىن جوعارى باعالاعان ەدى. بۇل تۇسىنىكتى دە. سەبەبى قازاقستان بۇرىنعى كەڭەستىك ەلدەر اراسىندا ەڭ ءبىرىنشى بولىپ مەملەكەتتە يسلامدىق قارجىلاندىرۋدىڭ ەركىن جۇمىس ىستەۋىنە مۇمكىندىك بەرەتىن زاڭ جوباسىن قابىلدادى. 2007-جىلى ەلىمىزدە «ءال-حيليال» يسلامدىق بانكى قۇرىلدى. بۇگىنگى تاڭدا اتالعان قارجى ۇيىمى ەلىمىزدە جالپى سوماسى 80 ميلليون دوللاردى قۇرايتىن 7 جوبانى قارجىلاندىرىپ وتىر.
الەمدىك يسلام قارجىلاندىرۋ (Global Islamic Finance Award, GIFA) سىيلىعى الەمدىك جانە ايماقتىق دەڭگەيدە يسلامدىق بانكينگ پەن قارجىلاندىرۋدى دامىتۋداعى ماڭىزدى جەتىستىكتەرى ءۇشىن بەرىلەدى. سىيلىق ءتىزىلىمى اكتيۆتەردى باسقارۋ، كورپوراتيۆتىك قۇقىق، ءى ت، الەۋمەتتىك جاۋاپكەرشىلىك، كاپيتال نارىعى، ءبىلىم سىندى ءتۇرلى 22 اتالىمدى قامتيدى. سىيلىق جەڭىمپازىن انىقتاۋ ادىستەمەسىن لوندوندا قونىستانعان «Edbiz Consulting Limited» حالىقارالىق يسلامدىق قارجىلاندىرۋ كونسالتينگتىك فيرماسى جۇرگىزەدى.
يسلامدىق قارجى جونىندەگى حالىقارالىق سىيلىقتى تابىس ەتۋ ءراسىمى العاش رەت 2011-جىلدىڭ جەلتوقسانىنا ماسكات قالاسىندا وتكەن 1- ومان يسلام ەكونوميكالىق فورۋمىندا ۇيىمداستىرىلعان ەدى. ول كەزدە «يسلامدىق قارجى بويىنشا جاھاندىق كوشباسشى» سىيلىعى مالايزيادا يسلامدىق بانكينگ پەن قارجى ءۇشىن بارلىق ينفراقۇرىلىم جاساعانى ءۇشىن ەلدىڭ بۇرىنعى قارجى ءمينيسترى جانە ەكس-پرەمەر-ءمينيسترى ابدۋللا احماد باداۆيگە بەرگەن-ءدى.
2012-جىلدىڭ قاراشاسىندا كۋالا-لۋمپۋردا وتكەن ازيا قارجىلىق فورۋمىندا بۇل مارتەبەلى سىيلىق مالايزيانىڭ پەراك شتاتىنىڭ مۇراگەر حانزاداسى رادجا نازرين شاحقا تابىس ەتىلدى. ال وتكەن جىلى 26- قاراشادا ءۇشىنشى سىيلىققا دۋبايدا وتكەن دۇنيەجۇزىلىك كونفەرەنتسيادا پاكىستاننىڭ بۇرىنعى پرەمەر-ءمينيسترى شاۋكات ازيز يە بولدى.
اۆتور: مارلان جيەمباي
