قازاقستاننىڭ باستاۋىش سىنىپ وقۋشىلارى « عىلىمعا كىرىسپە» ءپانىن وقيدى
بۇل تۋرالى ق ر ءبىلىم جانە عىلىم ۆيتسە- ءمينيسترى ەسەنعازى يمانعاليەۆ «كورەيا رەسپۋبليكاسىنىڭ ۇلگىسىندە ونەرتاپقىشتىق جانە كرەاتيۆتى ويلاۋعا ۇيرەتۋ ادىستەمەسى» وقۋ سەمينارىنىڭ بارىسىندا حابارلادى.
ە. يمانعاليەۆتىڭ سوزىنە قاراعاندا، بۇل ءپان نازاربايەۆ ينتەللەكتۋالدى مەكتەپتەرىنىڭ نەگىزىندە قابىلداندى جانە قازىرگى ۋاقىتتا ونى جالپى ءبىلىم بەرەتىن مەكتەپتەردىڭ باعدارلاماسىنا ەنگىزۋ بويىنشا جۇمىستار جۇرگىزىلىپ جاتىر.
«وسى كۇنى اتالعان جاڭالىقتى ەنگىزۋ ءۇشىن بۇل تاجىريبە نازاربايەۆ ينتەللەكتۋالدى مەكتەپتەرىنىڭ نەگىزىندە تالدىقورعان، استانا جانە كوكشەتەۋدا باستاۋىش سىنىپتارىنا جۇرگىزىلدى. جانە ول جالپى ءبىلىم بەرەتىن مەكتەپتەرگە تارالۋدا. قازىر ءبىزدىڭ مۇعالىمدەردىڭ 27 پايىزى نازاربايەۆ ينتەللەكتۋالدى مەكتەپتەرىنىڭ بازاسىندا ءۇش دەڭگەيلى كۋرستاردا ءوتتى. ولار كەمبريدج ۋنيۆەرسيتەتىمەن بىرگە وسى جوبانى جۇزەگە اسىرۋدا»، - دەپ حابارلادى ە. يمانعاليەۆ.
سەمينار جۇمىسىنا دۇنيەجۇزىلىك ونەرتاپقىش جانە كاسىپكەر ايەلدەر قاۋىمداستىعىنىڭ پرەزيدەنتى حان مي ەنگ، سونىمەن بىرگە ينتەللەكتۋالدى مەنشىك دۇنيەجۇزىلىك ۇيىمىنىڭ وكىلدەرى قاتىستى.
