قولىڭىزدا بار بۇيىمدى نەدەن جاسالعانىن بايانداپ، سۋرەتىن ادرەسىمىزگە جولداڭىز، بايعازىمىز بار

سونىڭ ارقاسىندا ادامزات اتاۋلى - قاي حالىقتى الساڭىز دا ۇرپاعىنا ولمەس مۇرا قالدىردى.

ونىڭ قاي-قايسىسى دا قولى التىن شەبەرلەردىڭ عانا قولىنان شىققان.

وسىعان قاراپ وتىرىپ جاراتقاننىڭ ءوزى كەز كەلگەن كىسىگە ەرەكشە دارىن مەن قابىلەت بەرمەيتىنىنە كوز جەتكىزۋگە بولادى. شەبەردىڭ شەبەرى عانا ماڭگىلىك مۇرا جاسايدى.

ءتىپتى جوقتان بار جاسايتىنداردى كورگەندە، امالسىزدان قايران قالاسىز.

مۇنداي ۇساق كاسىپتىڭ ءوزى قازىرگىدەي نارىق زامانىندا ادامداردىڭ وتباسىن اسىراۋىنا مۇمكىندىك بەرەدى. ايتالىق، حالقى ميللياردتى باعىندىرعان ءۇندىستان مەن قىتايدا تۇرعىندار تەك شاعىن كاسىپ ارقىلى كۇندەلىكتى نانىن تۋىپ جەۋدە. كوشەلەردىڭ كوركىن كىرگىزگەن ساۋدا دۇڭگىرشەكتەرىنەن تاپپايتىنىڭىز جوق. تامساناسىز، تاڭعالاسىز.

ءتىپتى وتكەن عاسىردا سوعىستان كوز اشپاعان شاعىن عانا ۆەتنام حالقىنىڭ ءوزى تۇرمىسىن لەزدە تۇزەپ العان. وسى ايماقتاعى ءبىرقاتار ەلدەردىڭ تۇرعىنى بامبۋك اعاشىنىڭ ارقاسىندا جان ساقتايدى. ودان جاساعان شي قالپاقتار مەن سومكەلەر، جەلپۋىشتەر ەل اسىپ، الەم ارالاپ كەتتى. تايلاند، سينگاپۋر سەكىلدى ەلدەردە بالشىق پەن قىشتان جاسالعان سۋۆەنيرلەر تۋريستەردىڭ كوز قۋانىشىنا اينالعان.

ال كۇنى ىستىق، قۇمدى وڭىرلەر -  ساعىمنان باس اينالدىراتىن مەملەكەتتەردە قۇمىرا ىشىنە قۇمنان سۋرەت سالىپ بەرۋ ءداستۇرلى ونەر سانالادى. ءتىپتى اينەك بەتىنە قۇمنان ءتۇرلى سۋرەت سالۋ دا بۇگىنگى كۇنى ادام اتاۋلىنى قىزىقتىرىپ وتىر. مۇنى قازاقستاندىقتار ءبىرقاتار تەلەارنالاردىڭ جۇلدىزناما كەزىندە جۇلدىز كەسكىندەرىن قۇممەن سۋرەتتەيتىن ساتتەرىنەن كورىپ جۇرگەن بولار.

ءتىپتى ءبىرقاتار ەلدەردە تەڭىز جاعالارىندا قۇمنان جاسالعان ونەر تۋىندىلارىنىڭ كورمەسى ءوتىپ تۇرادى. انشەيىندە سۋسىپ قولعا تۇرمايتىن قۇمنىڭ قۇدىرەتىنە وسىندايدا باس شايقايسىڭ. قۇمدى قاتىرىپ قالا، اڭ-قۇس، ەرتەگى كەيىپكەرىن، باتىرلار بەينەسىن جاساۋ دەگەن شىن مانىندە كىسى قىزىعاتىن ونەر. سوڭعى ۋاقىتتا قىستىڭ كۇندەرى مۇزدان مۇراجاي، قامالدار، ءتىپتى قوناق ءۇي سالۋ تۇككە تۇرماي قالدى. ءبىزدىڭ بۇرىندارى قاردان اققالا تۇرعىزاتىن كەزدەرىمىز مۇنىڭ جانىندا ەشتەڭە ەمەس.

ءيا، مەكتەپتەردە قولونەر ۇيىرمەلەرى وتكەن عاسىردا جاقسى جۇمىس ىستەدى. بالالاردى ونەرگە تەگىن ۇيرەتتى. ءبىراق ەرەكشە قارىم-قابىلەتكە يە ورەندەر عانا ومىردەن ءوز جولىن تاپتى دا، وزگەلەردىڭ جۇرەك قالاۋى باسقا بولدى. الايدا سول كەزدە ونەر قازىرگىدەي قۇدىرەتكە يە بولماعانىن دا مويىنداعان ءجون شىعار.

جاساعان زاتىڭدى ءباسساۋداعا تىگىپ ساتا المايتىنسىڭ. قولدان جاسالعان قۋىرشاق تۇگىلى باسقا دا قۇندى زاتتار بوساعادان بازارعا شىعا المايتىن. نارىق ءدال وسى قۇندىلىقتىڭ قادىرىن ارتتىردى. ون ساۋساعى ويناپ تۇرعانداردىڭ ايى وڭىنان تۋدى. دەگەنمەن، ءبىزدىڭ بويىمىزداعى بويكۇيەزدىك پەن جالقاۋلىق جانعا باتىپ تۇر. ال وزگە ۇلت وكىلدەرىنىڭ قايسى ءبىرى قولونەرىمەن- اق بايىپ كەلەدى.

بىردە الماتىدا وتكەن مەرەكە كەزىندە كيىزدەن جاسالعان قول سومكە، قورجىن، تۇيە، جىلقى بەينەلەنگەن سۋۆەنيرلىك زاتتاردى كوردىك. ءبىزدى بىردەن ەلەڭدەتكەنى اق كيىزگە باسىلعان نەشە ءتۇرلى بوياۋعا مالىنعان ۇلتتىق ورنەكتەر بولدى. ساتۋشى ورىس ايەلدىڭ ايتۋىنشا سول زاتتاردى ءوزى جاساعان جانە وتىمدىلىگى وتە جوعارى.

ءىستىڭ كوزىن تاپقاندار وسىلايشا پايداعا كەنەلۋدە. ال بازاردا ورىس شالىنىڭ مونشاقتان جاساعان الما اعاشى، اپورت، قۇمىرا سەكىلدى زاتتارىن دەمدە ساتىپ الىپ جاتقانداردى دا كورىپ، باس شايقادىق. بۇدان اڭعارعانىمىز سۇرانىسقا يە زاتتار ادەمى جاسالسا، ول وتە تەز ساتىلادى.

ءبىر قىزىعى، قازىر بيسەردەن ورنەك سالىپ، ءتۇرلى زاتتار جاساۋ، ءتۇرلى جەمىس پەن كوكونىس داندەرىن دە كادەگە اسىراتىندار كوبەيدى. الماتىداعى ءبىر بالالار شيپاجايىنىڭ باسشىسىنا بارعاندا بولمەسىندە ءىلۋلى تۇرعان قۇمىراداعى گۇلدەر بەينەلەنگەن كارتينا ءبىزدى قاتتى قىزىقتىردى.

سۇراستىرا كەلسەك، الگى زاتتاردى دارىگەردىڭ ءوزى جاساپتى. گۇلدەردى جاساۋعا جەمىس پەن كوكونىس داندەرى عانا قولدانىلىپ، تەك بەتى لاكپەن بويالعان. ەگەر سول زاتتى بازارعا شىعارساڭىز، ويلانباي ساتىپ الاتىندار تابىلادى.

وسى سەكىلدى ونەردى مەڭگەرگەندەر الەمدە ءتىپتى كوپ. قاۋىن مەن قاربىز، اسقاباق قابىعىن كادەگە اسىرىپ، شەمىشكە مەن باسقا دا داقىلداردىڭ دانىنەن قىمبات بۇيىمدار جاساعاندار قاتارى جىل سايىن كوبەيىپ كەلەدى.

ءتىپتى كورىنگەن جەردە جاتاتىن تەمىر-تەرسەك، شيشا، اعاش بۇتاقتارىنان دا كوزتارتارلىق بۇيىم جاساعانداردى كوردىك. مۇنىڭ بارلىعى ادامدى ءبىر عانا نارسەگە ۇمتىلدىرادى. ەبىن تاپساڭ جەردە جاتقان كەز كەلگەن زاتتان قاجەتتى بۇيىم جاساۋعا بولادى ەكەن.

ال جاسالعان زات ساپالى، ادەمى، كىسى قىزىعارلىقتاي بولسا، ونى بازاردا وڭاي ساۋدالايسىز . ەگەر ءسىز ونەردىڭ وسىنداي تۇرلەرىمەن اينالىسار بولساڭىز، قولىڭىزدا بار بۇيىمدى نەدەن جاسالعانىن بايانداپ، سۋرەتىن joldas216@mail.ru ەلەكتروندى ادرەسكە جولداڭىز.

ەڭ ادەمى بۇيىمعا بەرەر بايعازىمىز بار.

دۋاناباي جولداسبەك

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى