قازاقستاندا تۇڭعىش رەت وكپە اۋىستىرىلاتىن بولدى

بۇل تۋرالى ورتالىقتىڭ باس ديرەكتورى جەتكەرگەن ارزىقۇلوۆ ءمالىم ەتتى.

قازاقستاندا مۇنداي وپەراتسيا العاش رەت جاسالعالى تۇر.

قازىرگى تاڭدا الەمدە ستاتيستيكا بويىنشا 1 ميلليون ادامعا شاققاندا 10 ادام وسىنداي وتاعا مۇقتاج. ال، قازاقستاندا ەكولوگيالىق احۋالعا بايلانىستى مۇقتاج ناۋقاستاردىڭ سانى ودان ارتىق بولۋى مۇمكىن. كۇتۋ ءتىزىمى قازىر الماتى قالاسى بويىنشا جاسالىپ جاتىر. ناۋقاستار ءنومىر 1 -قالالىق اۋرۋحانا بازاسىندا تىركەلەدى.

ايتا كەتۋ كەرەك، مۇنداي كۇردەلى وپەراتسيالار ا ق ش پەن ەۋروپادا عانا جاسالادى. ال، ورتالىق ازيادا بۇل قادامعا ا. ن. سىزعانوۆ اتىنداعى ۇلتتىق حيرۋرگيا ورتالىعى تۇڭعىش رەت بارعالى وتىر.

قازىر ورتالىق ماماندارى نيدەرلاندىداعى گرونينگەن قالاسىندا ۇزدىك كلينيكادا ارنايى وقىتۋدان ءوتىپ كەلدى. كۇردەلى وتانى جاساۋ كەزىندە گرونينگەندەگى حيرۋرگيالىق توپ قازاقستانعا كەلىپ كەڭەس بەرەتىن بولادى.

باس ديرەكتوردىڭ ايتۋىنشا، ا. سىزعانوۆ اتىنداعى ورتالىقتا وسى ماقساتتا قۇنى قىمبات تۇراتىن ارنايى اپپاراتۋرا ساتىلىپ الىندى.

«وكپە دونورى - وتە كۇردەلى ماسەلە. جول اپاتىنان قازا بولعان ادامداردىڭ وكپەسى الۋعا جارامايدى. ويتكەنى، باسىنان جاراقاتتانسا، ول ادامنىڭ تىنىس جولدارىنا سۋ قۇيىلىپ كەتەدى. ءتىپتى، دونور تەز تابىلعاننىڭ وزىندە اعزا مۇشەسىن ناۋقاس ادامعا سالۋ ءۇشىن 4 اق ساعات ۋاقىت بار. ويتكەنى، تەك وسى ۋاقىت ارالىعىندا عانا ءومىر سۇرەدى. سوندىقتان، ءبىز كەز-كەلگەن ۋاقىتقا ءازىر بولۋىمىز كەرەك»، - دەدى ورتالىق ديرەكتورى جەتكەرگەن ارزىقۇلوۆ.

وسى ۋاقىتقا دەيىن اتالعان عىلىمي ورتالىقتا 667 بۇيرەك، 1 جۇرەك، 14 باۋىر الماستىرىلدى. ءساتتى وتكەن بىرنەشە وپەراتسيادان كەيىن حالىق اراسىندا اعزا اۋىستىرۋعا قاتىستى كوزقاراس ءبىرشاما جاقسارعان.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى