ق ر پرەزيدەنتىنە بەرىلگەن «يسلامدىق قارجى بويىنشا جاھاندىق كوشباسشى» سىيلىعى - ءبىزدىڭ ەلىمىز ءۇشىن ەرەكشە مارتەبە - ت. سۇلەيمەنوۆ
مۇنداي ويدى قازاقپارات تىلشىسىنە ساياسي عىلىمداردىڭ دوكتورى، ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ پروفەسسورى، قازاقستاننىڭ تۇڭعىش سىرتقى ىستەر ءمينيسترى تولەۋتاي سۇلەيمەنوۆ ايتتى.
ايتا كەتەيىك، اتالعان سىيلىق ق ر پرەزيدەنتى نۇرسۇلتان نازاربايەۆقا يسلامدىق قارجى نارىعىن ايماقتىق جانە حالىقارالىق دارەجەدە دامىتۋ مەن جەتىلدىرۋدە جەتكەن جەتىستىكتەرى ءۇشىن بەرىلىپ وتىر.
«بۇل ەلىمىز ءۇشىن ۇلكەن مارتەبە ەكەنىن باسا ايتقىم كەلەدى. بۇل پرەزيدەنتىمىزدىڭ يسلام الەمىنەن وسىنداي ۇلكەن سىيلىقتى تۇڭعىش رەت الۋى. تاڭداۋدىڭ ءدال ءبىزدىڭ مەملەكەت باسشىسىنا ءتۇسۋى دە تەگىننەن- تەگىن ەمەس. ويتكەنى تاۋەلسىزدىك العان جىلدارى، اسىرەسە ءبىزدىڭ ەلىمىز يسلام كونفەرەنسياسى ۇيىمىنا ەنگەن 1995 - جىلدان باستاپ نۇرسۇلتان نازاربايەۆ يسلام قوزعالىسىنىڭ دامۋىنا، سونداي- اق، قازاقستاننىڭ اتالعان ۇيىممەن تىعىز بايلانىس ورناتۋىنا ولشەۋسىز ۇلەس قوستى»، - دەدى ت. سۇلەيمەنوۆ.
ونىڭ ايتۋىنشا، پرەزيدەنت نازاربايەۆ يسلام ەلدەرىنە ءار بارعان سايىن ولارمەن تىعىز قارىم- قاتىناس ورناتۋعا بارىنشا كۇش سالىپ، ەكونوميكالىق، ساۋدا- ساتتىق بايلانىستارعا باسا نازار اۋدارادى.
«سوڭعى جىلدارى يسلام ەلدەرىنەن كەلەتىن ينۆەستيتسيالاردىڭ بىرنەشە ەسە ۇلعايعانىن ايتسا دا جەتكىلىكتى. وعان يسلام دامۋ بانكىنىڭ قۇرىلۋى، يسلام كونفەرەنسياسى ۇيىمىنىڭ سامميتى وتكىزىلۋى سياقتى شارالار نەگىز بولدى. وزدەرىڭىز بىلەسىزدەر، پرەزيدەنتتىڭ ۇسىنىسىمەن ول ۇيىم يسلام ارىپتەستىك ۇيىمى دەپ وزگەرتىلىپ، وتىرىسى استانادا ءوتتى. سول جيىندا قابىلدانعان دەكلاراتسيا ەلدەرىمىزدىڭ بىرىگۋىنە ۇلكەن ۇلەس قوستى»، - دەپ اتاپ ءوتتى پروفەسسور.
ت. سۇلەيمەنوۆتىڭ مالىمەتىنشە، بۇكىل الەمدىك يسلامدىق ەكونوميكالىق فورۋمى ءبىزدىڭ پرەزيدەنتىمىزدىڭ كانديداتۋراسىن كەزدەيسوق تاڭداعان جوق. فورۋم نۇرسۇلتان نازاربايەۆتىڭ حالىقارالىق دەڭگەيدەگى بەدەلى بار قايراتكەر ەكەنىن مويىندادى.
«مەنىڭ ويىمشا، بۇگىنگى وقيعا قازاقستان ءۇشىن وتە ماڭىزدى. ول ەلىمىزدىڭ بەدەلىن ءوسىرىپ، قازاقستاننىڭ بۇكىل الەم بويىنشا بەيبىتشىلىك پەن دامۋعا ءوز ۇلەسىن قوسىپ كەلە جاتقانىن تاعى ءبىر رەت دالەلدەدى. بۇل جەتىستىككە پرەزيدەنتىمىزدىڭ سىڭىرگەن ەڭبەگى مول. مەن ول كىسىنى ءوز اتىمنان جانە بۇكىل ەل اتىنان وسىناۋ ۇلكەن سىيلىعىمەن شىن جۇرەكتەن قۇتتىقتاپ، زور دەنساۋلىق، مول باقىت جانە ۇزاق عۇمىر تىلەيمىن. ەلباسىمىز بولاشاقتا دا ەلىمىز ءۇشىن ەرەن ەڭبەگىن ەسەلەپ جۇرە بەرسىن!» - دەدى پروفەسسور.
دۋباي
