قازاق بالەتى وڭتۇستىك كورەيا كورەرمەندەرىن ءتانتى ەتتى
وتكەن دەمالىس كۇندەرى سەۋلدە ەل تۇرعىندارى مەن قوناقتارى قازىرگى زامانعى قازاقستاندىق ونەردى تاماشالاۋ مۇمكىندىگىنە يە بولدى.
بۇل تۋرالى ق ر س ءى س باسپا ءسوز قىزمەتىنەن حابارلادى.
"Astana Ballet" ارتىستەرى سەۋلدىڭ ەڭ ءىرى كونسەرتتىك الاڭدارىنىڭ ءبىرى - "Yeouido KBS Hall" ساحناسىندا بولات عافاروۆ پەن ارماند اماردىڭ مۋزىكاسىنا جازىلعان ايگىلى رەسەيلىك حورەوگراف نيكيتا دميتريەۆسكيدىڭ قويىلىمىمەن ءبىر اكتىلىك "الەم" بالەتىن حالىقارالىق دەڭگەيدە پاش ەتتى.
"Astana Ballet" ونەرىن كورۋگە جينالعان كارىس كورەرمەندەرى ساحنا ساڭلاقتارىنىڭ ناعىز شەبەرلىگىن وتە جوعارى باعالادى. كلاسسيكالىق، قازىرگى زامانعى جانە ۇلتتىق بيلەردىڭ تاڭقالارلىق ۇيلەسىمى بولىپ تابىلعان "الەمنىڭ" دەكوراتسياسى رەتىندە وتە كۇردەلى پارتيتۋرا، ارنايى اسەرلەر، كومپيۋتەرلىك گرافيكا جانە قازاق دالاسىندا ارنايى تۇسىرىلگەن بەينەلەر قولدانىلعان.
ادەمى اسەردىڭ جەتەگىندە قالعان كورەرمەندەر قويىلىم سوڭىندا ورىندارىنان تۇرىپ، ۇزاق ۋاقىت بويى قول سوعىپ، شىنايى قوشەمەتتەرىن ءبىلدىردى.
كورەيانىڭ ونەر قايراتكەرلەرى جانە ساراپشىلارى قويىلىمنىڭ تەحنولوگيالىق سۇيەمەلدەۋىن جوعارى باعالاپ، مۇندايدى ءتىپتى وڭتۇستىك كورەيادا بۇرىن-سوڭدى كەزدەستىرمەگەندەرىن اتاپ وتۋدە.
حورەوگرافيالىق ونەردىڭ جارقىن بەينەلەرىنە باعىتتالعان "Astana Ballet" شىعارماشىلىق ۇجىمى قازاقستاننىڭ ۇلتتىق ءبي ونەرىنىڭ الەمدىك مادەني ۇدەرىسىنە قوسىلۋىن كوزدەۋدە.
"الەم" بالەتى - ادام جانىنىڭ تاريحى، ونىڭ ادام دەنەسىندە قالاي ورىن الاتىنىن جانە ادامنىڭ دۇنيەگە كەلەر الدىندا قانداي اۋىر سىناقتاردان وتەتىنىن سۋرەتتەيدى. بۇل فيلوسوفيالىق بالەتتىڭ نەگىزى - ەجەلگى قازاق ەپوسى، ادامزاتتىڭ پايدا بولۋى تۋرالى اڭىز بولىپ تابىلادى.
قويىلىم ارنايى "Astana Ballet" ءۇشىن شىعارىلعان. بۇل قازاقستاننان شىققان جاس ۇجىمنىڭ ەڭ ۇلكەن دەربەس جۇمىسى جانە العاشقى الەمدىك ساپارى بولىپ تابىلادى. بۇعان دەيىن "الەم" بالەتى ۆەنا، پاريج جانە ماسكەۋدە تاماشالاندى.
