گولوۆكيننىڭ كەلەسى قارسىلاسى جايلى نە بىلەمىز؟
وسىعان دەيىن ك2 Promotions پەن Golden Gloves پروموۋتەرلىك كومپانيالارى قوس بىلعارى قولعاپ شەبەرىنىڭ شارشى الاڭدا كەزدەسۋىنە كەلىسىم جاساعان- دى. GGG پروموۋتەرى توم لەففلەر جەرلەسىمىزدىڭ تەك ا ق ش جەرىندە عانا ەمەس، ەۋروپادا دا جەكپە- جەك وتكىزۋىن ماڭىزدى ساناپ وتىر.
گەننادي گولوۆكين مارك انتونيو رۋبيونى جەڭگەننەن كەيىن وعان قارسىلاس اتانا الاتىن بىرنەشە بوكسشىلاردىڭ ءتىزىمى بەلگىلى بولعان ەدى. ميگەل كوتتو، ساۋل الۆارەس، حۋليو سەزار چاۆەس (كىشىسى) پەن اندرە ۋورد قاتارىنان مارتين ميۋررەيدى كورمەگەن بولاتىنبىز. اسىرەسە، سوڭعىسىنىڭ وتانداسىمىزبەن جۇدىرىقتاسۋعا قۇلشىنىسى جوعارى بولاتىن. الايدا GGG مەن امەريكالىق بوكسشى پروموۋتەرلەرى كەلىسىمگە كەلمەدى. كەي اقپارات قۇرالدارى گەننادي گولوۆكيندى قاشقاقتاپ وتىر دەپ تە جازۋدا. ال شىن مانىندە سولاي ما؟
بىرىنشىدەن، اندرە ۋوردتىڭ جەكپە- جەككە شىقپاعانىنا 11 ايدىڭ ءجۇزى بولدى. سوڭعى كەزدەسۋىن 2013 - جىلدىڭ 16 - قاراشاسىندا ەدۆين رودريگەسكە قارسى وتكىزگەن ەدى. سول جۇدىرىقتاسۋدا جەڭىلگەن دومينيكا رەسپۋبليكاسىنىڭ بوكسشىسى گەنادان اندرە ۋوردتىڭ باسىم تۇسەتىنىن ايتتى. ءبىراق، امەريكالىقتىڭ جۇدىرىقتاسۋعا قۇلشىنىسى بولعانمەن، ەكىنشى نومىرمەن ونەر كورسەتۋدەن جاسقاناتىنى راس. سونىمەن قاتار، قوس تاراپتىڭ قارجى ماسەلەسى دە ىمىراعا سايكەس كەلمەي وتىرعان سەكىلدى. ەكىنشىدەن، گەننادي گولوۆكينگە اندرە ۋوردپەن جۇدىرىقتاسۋدان الدىن ميگەل كوتتو مەن ساۋل الۆارەس جەكپە-جەگىنىڭ جەڭىمپازىمەن كەزدەسۋدىڭ ماڭىزى جوعارى.
بوكس سۇيەر قاۋىم مارتين ميۋررەيدى گەنا ءۇشىن اسا مىقتى قارسىلاس سانامايدى. بريتاندىق بوكسشى مەكسيكالىق مارك انتونيو رۋبيونىڭ كۇيىن كەشىپ جاتسا تاڭدانبايتىنى انىق. ال وتانداسىمىزدىڭ پروموۋتەرى توم لەففلەر بولسا، بريتاندىق بوكسشىنى ورتا سالماقتاعى الەمنىڭ مىقتىلارىنىڭ قاتارىنا قوسىپ وتىر. سونىمەن كەلەسى قارسىلاس جايلى ايتا وتىرايىق.
ورتا سالماقتا WBC جۇيەسى بويىنشا كۇمىس بەلبەۋ يەگەرى مارتين ميۋررەي كاسىبي بوكستا 31 جەكپە-جەك وتكىزگەن. ونىڭ 29 ىندا جەڭىسكە جەتسە، 1 جەكپە-جەكتە تەڭ ءتۇسىپ، 1 جۇدىرىقتاسۋىن جەڭىلىسپەن اياقتاعان. شارشى الاڭعا ەكى كۇن الدىن عانا كوتەرىلىپ، يتاليالىق دومەنيكو سپادانى جەڭگەن بريتاندىق بوكسشى گەنادان وڭايلىقپەن جەڭىلمەيتىنىن تىلگە تيەك ەتتى.
- گولوۆكين - ءسوزسىز مىقتى بوكسشى. ءبىراق، ول وسى ۋاقىتقا دەيىن مەن سەكىلدى ادۋىندى قارسىلاسپەن كەزدەسە قويعان جوق. مەن ورتا سالماقتاعى كەز كەلگەن بوكسشىنى جەڭە الامىن دەگەن سەنىمدەمىن. ەگەر مەن وزىمە سەنبەسەم، بۇل كەزدەسۋگە كەلىسىمىمدى بەرمەس ەدىم. گەننانىڭ بۇعان دەيىنگى قارسىلاستارى رينگكە جەڭىلىپ بارىپ شىققانىن ايتا كەتۋىمىز كەرەك. ال مەنىڭ ءجونىم بولەك، - دەدى.
ەكى بىلعارى قولعاپ شەبەرى دە كاسىپقوي بوكستا 31 كەزدەسۋ وتكىزگەن. ءوزارا جۇدىرىقتاسۋلارى 32 - جەكپە- جەكتەرىن تىركەمەك. تاعى ءبىر قىزىعى، ەكەۋىنىڭ دە جاسى 32دە ەكەن. GGG 31 كەزدەسۋىنىڭ 27 سىن مەرزىمىنەن بۇرىن نوكاۋتپەن اياقتاعان. ال قارسىلاس بولسا بۇل كورسەتكىشپەن ساناسا المايدى. مارتين ميۋررەي 12 جەكپە- جەگىندە عانا نوكاۋتپەن جەڭىسكە جەتكەن.
ايتا كەتەيىك، گەننادي گولوۆكين ءوزىنىڭ سوڭعى جەكپە جەگىن قازاننىڭ 19- كۇنى ا ق ش- تا وتكىزگەن بولاتىن. مەكسيكالىق مارك انتونيو رۋبيونى ەكىنشى راۋندتا- اق نوكاۋتقا جىبەرىپ، WBA Super جانە IBO- دان بولەك WBC اتالىمىنىڭ ۋاقىتشا چەمپيونى اتاعىن قوسا ۇتىپ العان ەدى.
massaget.kz
