ەرەيمەنتاۋ اۋدانىنىڭ تۇرعىنى ەشكى ساۋىپ، ءسۇتىن ساتۋدا
بۇل جولى جۇرت ونشا ءمان بەرە قويمايتىن كاسىپتى دوڭگەلەتىپ وتىرعان استانا گۋمانيتارلىق كوللەدجىنىڭ تۇلەگى ەرەيمەنتاۋ اۋدانى كۇنشالعان اۋىلىنىڭ تۇرعىنى سامەنبەت جانۇزاق بولىپ وتىر. ونىڭ ايتۋىنشا، وتباسىلىق تابىس كوزىنە اينالعان ونىڭ بۇل كاسىپپەن اينالىسىپ، جاتقانىنا كوپ بولماپتى.
«انامنىڭ ەشكى ساۋىنىن قولعا العانىنا ءبىر ايعا جۋىقتاپ قالدى. جيىرما بەس باس ەشكى مالى كۇنىنە ەكى رەت ساۋىلادى. بۇل تۇلىكتىڭ ءبىر ەرەكشەلىگى كوپ كۇتىمدى قاجەت ەتپەيدى. ءسۇتى دە قۇنارلى، ەتى دە اعزاعا جەڭىل سىڭەدى. مال شارۋاشىلىعىن كاسىپ ەتكەن اتا- بابامىز وسىنىڭ ءبارىن باعزى زاماننان جاقسى بىلگەن عوي. كۇندەلىكتى ساۋىلعان ءسۇتتى قۇتىلارعا قۇيىپ، اپتاسىنا ەكى رەت ەرەيمەنتاۋدان اۆتوبۋسپەن استاناداعى ساۋدا ورىندارىنا جەتكىزىپ تۇرامىز»، - دەيدى س. جانۇزاق.
سونىمەن قاتار، ول اسىل تۇقىمدى ءسۇتتى ەشكى ساتىپ الۋدى دا كوزدەپ وتىرعان كورىنەدى. وسى ارقىلى كاسىپكەر جىگىت قىسى- جازى ۇزدىكسىز ءسۇت وندىرمەك. سونداي- اق، ول كەلەشەكتە ەشكى ءسۇتىن تۇبەگەيلى ءىس قىلىپ، ودان ايران، ىرىمشىك، قۇرت ازىرلەپ قويماي، تەرىسى مەن ءتۇبىتىن دە كادەگە جاراتۋدى ماقسات ەتىپ وتىر. ال ەتىن ديەتالىق جەڭىل تاعام رەتىندە ساتپاقشى.
«جازدا انام ەكەۋمىز ۇزىندىعى ون مەتر كيىز باسىپ، ەشكى تەرىسىن يلەپ كوردىك. ناتيجە جامان بولمادى. تەك ساتىپ الۋشى تابىلماي تۇر. يلەنگەن مال تەرىسىنەن جەڭىل كولىككە لايىقتاپ ورىندىق قاپ، سىرت، اياق كيىم تىگۋ جانە قامشى مەن جۇگەن ورۋگە پايدالانساق اتا كاسىبىمىز جاڭعىرار ەدى»، - دەپ ءوز ويىمەن ءبولىستى كەيىپكەرىمىز.
اۆتور: اسلان وسپانوۆ
