ماسكەۋدە قازاق اقىنىنا ارنالعان شىعارماشىلىق كەش ءوتتى

بۇل شاراعا اقىننىڭ تۋىستارى، اقىندار، جازۋشىلار، عالىمدار مەن ستۋدەنتتەر جينالدى. قوناقتارعا فوتولار، اقىن مۇراعاتىنىڭ ماتەريالدارى ۇسىنىلدى. ولەڭدەرى مەن پوەمالارىنان ۇزىندىلەر وقىلدى. سونداي-اق، كورەرمەندەرگە ءى. جانسۇگىروۆتىڭ «قۇلاگەر» پوەماسىنىڭ جەلىسىمەن تۇسىرىلگەن بولات مانسۇروۆتىڭ «تريزنا» كوركەم فيلمى كورسەتىلدى.

بۇل شىعارما كەڭەس وداعى كەزىندە 15 جىل كورسەتىلمەگەن ەدى.

ءىلياس جانسۇگىروۆ قازاق ادەبيەتىنىڭ كورنەكتى وكىلى. ول بارلىق جانرلارىندا قالام تارتىپ، ەلەۋلى تۋىندىلار بەرگەن امبەباپ دارىن. اسىرەسە، ءوزىنىڭ اسا قۋاتتى سۋرەتكەرلىك تالانتىن پوەزيا جانرىندا كورسەتىپ، كۇللى قازاق ادەبيەتىنىڭ ماقتانىشىنا اينالعان تۋىندىلار بەردى.

العاشقى جيناعى 1928 - جىلى 34 جاسىندا جارىق كورگەن ءىلياس 5-6  جىلدىڭ ىشىندە قاتارىنان ارىنداپ العا وزىپ، ابايدان كەيىنگى ءداۋىردىڭ اسا كورنەكتى اقىنىنا اينالدى. پروزالىق، دراماتۋرگيالىق تالانتتى كەسەك تۋىندىلارىن ايتپاعاندا، "كۇي"، "كۇيشى"، "قۇلاگەر" سياقتى كلاسسيكالىق شىعارمالار تۋدىردى.

ول ا. س. پۋشكيننىڭ، م. يۋ. لەرمونتوۆتىڭ، ن. ا نەكراسوۆتىڭ، م. گوركيدىڭ، گ. گەينە مەن ۆ. گيۋگونىڭ، ع. توقايدىڭ، ك. ءلاحۋتيدىڭ شىعارمالارىن قازاق تىلىنە اۋداردى.

«ىلياس جانسۇگىروۆتىڭ 120 جىلدىعىن مادەنيەت پەن ادەبيەت وتە دامىعان ماسكەۋدە تويلاۋ، مەنىڭ پىكىرىمشە ۇلكەن جەتىستىك»، - دەيدى رەسەي حالىقتار دوستىعى ۋنيۆەرسيتەتىنىڭ ماگيسترانتى اياگۇل مانتاي.

ايتا كەتكەن ءجون، بۇل كەشتى ماسكەۋ ايماقتىق قازاق ۇلتتىق-مادەني اۆتونومياسى كەڭەسى، ماسكەۋ «قازاق دياسپوراسى» قورى، ماسكەۋ «مۇراگەر» قازاق مادەنيەتى قوعامى، ماسكەۋ ۇلتتار ءۇيى ۇيىمداستىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى