كەندىرلى دەمالىس ايماعىندا اۋەجاي قۇرىلىسىن سالۋعا قىتاي ينۆەستورلارى قىزىعۋشىلىق تانىتتى

بۇل تۋرالى  Tengrinews.kz  تىلشىسىنە ينۆەستيتسيالىق دامۋ ءمينيسترىنىڭ ورىنباسارى جەڭىس قاسىمبەك ايتتى.

ونىڭ ايتۋىنشا، بارلىق ينۆەستورلارمەن كەلىسىمگە كەلۋ مەرزىمى 2014 - جىلدىڭ سوڭىندا اياقتالادى. 

 «قىتاي جانە تۇركيا ينۆەستورلارىنىڭ جاعدايى قارالۋدا. ءبىز بۇگىن قىتاي ينۆەستورلارمەن جەرگىلىكتى جەردە اۋەجاي قۇرىلىسىن سالۋ تۋرالى كەلىسىمدەر جۇرگىزەمىز. سالىق ماسەلەسىنە قاتىستى تاعى باسقا جايتتارعا بايلانىستى ولار وزدەرىنىڭ تالاپتارىن ايتۋدا. انىقتالعان قيىندىقتار دا بار. ءبىراق جوبانىڭ بولاشاعى ۇلكەن. مەن ازىرگە قانداي كومپانيالارمەن كەلىسسوزدەر جۇرگىزىپ وتىرعانىمىزدى  ناقتى ايتا المايمىن. ولاردىڭ بۇل جوباعا قاتىسۋعا دا ينۆەستيتسيا سالۋعا دا ۇلكەن قىزىعۋشىلىعى بار. ولار مەملەكەتىمىزدەن ناقتى كەپىلدىك سۇراپ وتىر. كەلىسسوزدەردى ءبىز جەلوقسان ايىندا اياقتاۋدى جوسپارلاپ وتىرمىز» دەدى جەڭىس قاسىمبەك. 
  
 ول ينۆەستورلار كەندىردى دەمالىس ايماعىن ينفراسترۋكتۋرامەن قامتۋدى تالاپ ەتىپ وتىرعانىن، ايماققا جول، قۇبىر، سۋ، جارىق ورناتۋ قاجەتتىگىن العا تارتتى.
 «ەگەر ءبىز كەندىرلى ايماعىن دامىتقىمىز كەلسە، ىشكى ينفراسترۋكتۋرانى جەتىلدىرۋمىز كەرەك» دەيدى ول.  

ونىڭ ايتۋىنشا، كەندىرلى ايماعىنا قانشا ينۆەستيتسيا سالىناتىنى كەلىسسوزدەر اياقتالعاننان كەيىن بەلگىلى بولادى.

ەسكە سالايىق،  شەتەلدىك كەڭەسشىلەر  2020 - جىلى كەندىرلى ايماعىنا كەلەتىن تۋريستەردىڭ سانى جىل سايىن 640 مىڭ ادامدى قامتيتىنىن ايتىپ وتىر. تۋريستەردىڭ باسىم بولىگى رەسەيدەن كەلەدى دەپ توپشىلانۋدا. تۇركيالىق ينۆەستور Rixos Group قازىردىڭ وزىندە ىنتىماقتاستىق ورناتۋ ءۇشىن «سامۇرىق- قازىنا» حولدينگىمەن كەلىسىمگە قول قويدى.  
  «كەندىرلى» جوباسى بويىنشا ايماقتا ءتورت جانە بەس جۇلدىزدى قوناق ءۇي، اكۆا پاركتەر مەن كوتەدجدەر سالۋ جوسپارلانعان. ينۆەستيتسيالىق دامۋ مينيسترلىگى قۇرىلىس سالۋ قۇنىن 38,2 ميلليارد تەڭگەگە باعالاپ وتىر. كەندىرلى ايماعىنا سالىناتىن ينۆەستيتسيانىڭ جالپى كولەمى 600,6 ميلليارد تەڭگە. بۇل سومانىڭ شامامەن جارتىسى ينفراسترۋكتۋرانى دامىتۋعا جۇمسالادى.




بولاشاق جوبا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى