مايا مانەزا التىن الۋعا مىندەتتى ەمەس

بۇل تۋرالى اۋىر اتلەتيكادان قازاقستان قۇراماسىنىڭ باس باپكەرى الەكسەي ني ايتتى، دەپ جازادى «الاش ايناسى» گازەتى.

8-16 - قاراشا ارالىعىندا الماتىداعى بالۋان شولاق اتىنداعى سپورت سارايىندا اۋىر اتلەتيكادان الەم چەمپيوناتىنىڭ جالاۋى جەلبىرەيتىنى بەلگىلى. الاش توپىراعىندا العاش رەت وتەتىن بۇل باسەكەدە 2016 - جىلى برازيليانىڭ ريو- دە- جانەيرو قالاسىندا وتەتىن وليمپيادا ويىندارىنا ليسەنزيا ساراپقا سالىنادى.

سول سەبەپتى دە قازاقستان قۇراماسى بۇل دوداعا كىل مىقتىلاردى قاتىستىرادى. ولاردىڭ قاتارىندا وليمپيادا ويىندارىنىڭ چەمپيوندارى -  يليا يلين، سۆەتلانا پودوبەدوۆا، زۋلفيا چينشانلو جانە مايا مانەزا بار.

دەگەنمەن وسى زىلتەمىرشىلەردىڭ اراسىندا الداعى الەم بىرىنشىلىگى بارىسىندا مايا مانەزاعا ناقتى التىن الۋ كەرەك دەگەن تاپسىرما قويىلماعان ەكەن. بۇل تۋرالى اۋىر اتلەتيكادان قازاقستان قۇراماسىنىڭ باس باپكەرى الەكسەي ني قازاقستاندىق ب ا ق-نىڭ بىرىنە بەرگەن سۇحباتىندا ايتتى.

«بۇل الەم بىرىنشىلىگى ريو وليمپياداسىنا ليسەنزيا بەرەدى. سوندىقتان دا ءبىزدىڭ باستى ماقساتىمىز -  مۇمكىندىگىنشە كوپ ۇپاي جيناۋ. مانەزا جۇلدە ءۇشىن تالاسپايدى. ونىڭ الدىنا التىن الۋ كەرەك دەگەن ناقتى ماقسات قويىپ وتىرعان جوقپىز.

ونىڭ دا باستى ماقساتى -  مۇمكىندىگىنشە قورجىنعا كوبىرەك ۇپاي سالۋ. ءتىپتى ول 63 كەلىدە ەمەس، ودان اۋىر سالماقتا ونەر كورسەتۋى مۇمكىن. دەگەنمەن بۇل بىرىنشىلىكتە ەكى التىن الساق دەگەن جوسپارىمىز بار»، -  دەيدى ول.

سونداي-اق باپكەر الداعى الەم بىرىنشىلىگى بارىسىندا يليا يلين، سۆەتلانا پودوبەدوۆا، زۋلفيا چينشانلو ۇشتىگىنە ۇلكەن سەنىم ارتاتىنىن جانە قۇرامانىڭ ءالى دە بولسا تولىق جاساقتالماعانىن ايتتى.

«بۇل الەم بىرىنشىلىگى بارىسىندا مەن يليا يلين، سۆەتلانا پودوبەدوۆا جانە زۋلفيا چينشانلو ۇشتىگىنە ۇلكەن سەنىم ارتىپ وتىرمىن. بۇل سپورتشىلاردان بولەك باسقا اۋىر اتلەتتەر دە وزدەرىن جاقسى قىرىنان كورسەتە الادى دەگەن ويدامىن. دەگەنمەن، قۇراما قاتارىندا كوپتەگەن سپورتشىلاردىڭ جاس ەكەنىن ەسكەرگەنىمىز ءجون. ولار ءالى دە ءپىسىپ جەتىلۋ كەرەك. الەم بىرىنشىلىگىنە ساناۋلى عانا كۇندەر قالدى. مەن ازىرگە بۇل دوداعا قاتىسۋى مۇمكىن دەگەن سپورتشىلاردىڭ كەڭەيتىلگەن ءتىزىمىن جاسادىم. الايدا، ول الداعى ۋاقىتتا وزگەرىپ قالۋى ىقتيمال. ناقتى شەشىمدى 5 - قاراشا كۇنى جاريالايمىن»، -  دەيدى الەكسەي ني.

الاتاۋ باۋرايىندا وتەتىن باسەكەدە 75 ەلدەن 683 سپورتشى باقتارىن سىنايدى. ونىڭ 297 سى ايەلدەر بولسا، 404 ى ەرلەر. ايەلدەر جەتى سالماق دارەجەسى (48, 53, 58, 63, 69, 75, +75 كەلى) بويىنشا جەڭىمپازدار مەن جۇلدەگەرلەردى انىقتايدى. ال ەرلەر سەگىز سالماق (56, 62, 69, 77, 85, 94, 105, +105) بويىنشا سىنعا تۇسەدى. ەلىمىزدە تۇڭعىش رەت وتكەلى تۇرعان الەم چەمپيوناتىنا اۋىر اتلەتيكادان قازاقستان قۇراماسىنىڭ باس باپكەرى الەكسەي ني قاتىسۋعا مۇمكىندىگى بار دەگەن 19 سپورتشىنىڭ ەسىمىن اتادى. ونىڭ 10 ى ەرلەر بولسا، 9 ى ايەلدەر. جوعارىدا باپكەردىڭ ءوزى ايتقانداي بۇل ءالى ناقتى ءتىزىم ەمەس.

الەم بىرىنشىلىگىنە قاتىسۋى مۇمكىن دەگەن قازاقستان قۇراماسىنىڭ ءتىزىمى:

ەرلەر: ارلي چونتەي (56 كەلى)، البەرت ليندەر (69 كەلى)، كيريلل پاۆلوۆ (77 كەلى)، ۆلاديمير سەدوۆ جانە رۇستەم سىباي (ەكەۋى دە - 94 كەلى)، يليا يلين ( 105 كەلىگە دەيىن)، يبراگيم بەرسانوۆ جانە سەلىمحان اۋباكىروۆ (ەكەۋى دە - 105 كەلىدەن جوعارى).

ايەلدەر: مارگاريتا ەليسەيەۆا (48 كەلى)، زۋلفيا چينشانلو (53 كەلى)، ساۋلە ءسادۋاقاسوۆا (58 كەلى)، كورينا گوريچيەۆا جانە مايا مانەزا (ەكەۋى دە - 63 كەلى)، جازيرا جاپپارقۇل جانە گۇلناز ناۋرىزوۆا (ەكەۋى دە - 69 كەلى)، سۆەتلانا پودوبەدوۆا (75 كەلىگە دەيىن).

اۆتور: ۋاليحان قوسانباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى