قازان قالاسىنداعى ءدۇبىرلى دوداعا قازاقستان اتىنان كىم باراتىنىن بۇگىن انىقتالادى

«بايقاۋدىڭ قازاقستانداعى اقتىق سىنىندا قاتاڭ ىرىكتەۋدەن كەيىن تانىمال انشىلەرمەن قاتار، ونەر الەمىنە جاڭا قادام باسقاندار دا ساحناعا شىعادى. ولاردىڭ قاتارىندا جانار دۇعالوۆا، نۇرجان كەرمەنبايەۆ، مارحابا سابيەۆا، بەيبىت كۇشقاليەۆ، سەرىك يبراگيموۆ پەن «الاش ۇلى» توبى بار. ال فينالعا وتكەن تاعى ءبىر ءانشى قىزىمىز لۋينا وكىنىشكە وراي، بۇل سىنعا قاتىسا المايدى. ونىڭ سەبەپ- سالدارىن كورەرمەندەرىمىز شارا ۇستىندە بىلەتىن بولادى. بۇل ءانشىنىڭ ورنىنا ««V-Alem»  توبى شىعادى» ، دەپ ءمالىم ەتتى قازاقپارات تىلشىسىنە شارانى ۇيىمداستىرۋشىلار.

ايتا كەتەيىك، بايقاۋ بۇگىن ساعات 19.00-دە «حابار» ارناسىنان تىكەلەي ەفيردە كورسەتىلەدى.

«بايقاۋ جەڭىمپازى تۇنگە قاراي انىقتالادى. قازان قالاسىنداعى ءدۇبىرلى دوداعا ەلىمىزدىڭ اتىنان كىمنىڭ باراتىنىن قازاقستاندىقتار كەلتە حات ارقىلى داۋىس بەرۋ جولىمەن جانە ءادىلقازىلار انىقتايدى. ايتا كەتەيىك، قازىلار القاسىنىڭ قۇرامىندا كومپوزيتور جانە پروديۋسەر رەنات عايسين، ايتىسكەر اينۇر تۇرسىنبايەۆا، استانا قالاسىنىڭ مادەنيەت باسقارماسىنىڭ باسشىسى بولات ماجاعۇلوۆ، ءانشى التىناي جورابايەۆا مەن كومپوزيتور ارمان دۇيسەنوۆ بار»، - دەپ ناقتىلادى ۇيىمداستىرۋشىلار.

ەستەرىڭىزگە سالا كەتەيىك، «Turkvizyon» تۇركى جۇرتشىلىعى ءۇشىن «ەۆرو ۆيدەنيە» بايقاۋىنىڭ بالاماسى بولىپ تابىلادى. بۇل كونكۋرستى 300 ميلليونعا جۋىق ادام تاماشالايدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى