پايدالى قازبالار ءوندىرىسى قازاقستاندا جەر سىلكىنىسى قاۋپىن كۇشەيتىپ وتىر
بۇل تۋرالى وڭتۇستىك جانە ورتالىق ازياداعى سەيسمولوگيا سالاسىنداعى وڭىرلىك ىنتىماقتاستىق جونىندەگى سەمينار بارىسىندا قازاقستاننىڭ سەيسمولوگيا ينستيتۋتىنىڭ ديرەكتورى تاڭاتقان اباقانوۆ ايتتى. ونىڭ ايتۋىنشا، قازاقستانداعى جەر سىلكىنىستەرى تابيعي نەمەسە تەحنوگەندى سيپاتتا بولۋى مۇمكىن.
اباقانوۆ رەسەيدىڭ كەيبىر ايماقتارىن مىسالعا كەلتىردى - تۇمەن، باشقۇرتستان، تاتارستان وڭىرلەرىندە ءوندىرۋشى كومپانيالاردىڭ قىزمەتى باستالماعانعا دەيىن جەر سىلكىنىسى بايقالماعان. ەلىمىزدە ءوندىرىستىڭ سالدارىنان سەيسميكالىق قاۋپى ايتارلىقتاي ارتىپ وتىرعان ءوڭىر - باتىس قازاقستان. «قازىرگى ۋاقىتتا تابيعي قاۋىپپەن بىرگە، كومىرسۋتەگى شيكىزاتى مەن قاتتى پايدالى قازبالار وندىرىلەتىن وڭىرلەردە تەحنوگەندى قاۋىپ تە كۇشەيىپ وتىر. مۇناي مەن گازدى بارلاۋ بارىسىندا بۇل ماسەلە ەسكەرىلە بەرمەيدى، ءبىراق ءوندىرۋ مەن پايدالانۋ بارىسىندا ءبىزدىڭ ۇسىنىستارىمىزدى ەسكەرگەن ءجون، ويتكەنى ءبىز اتالعان ءوڭىردىڭ سەيسميكالىق قاۋپىن باعالايمىز»، - دەدى اباقانوۆ.
سەيسمولوگتىڭ ايتۋىنشا، قازاقستاندا ماگنيتۋداسى 7 دەن اساتىن تابيعي جەر سىلكىنىستەرى كوپ جىلدان بەرى بولعان جوق. بۇل جەر قويناۋىندا الەۋەتتى ەنەرگيانىڭ جينالىپ قالۋىنا ىقپال ەتەدى، ياعني كۇشتى جەراستى دۇمپۋلەرى قاۋپىن ارتتىرادى. اباقانوۆتىڭ ايتۋىنشا، سەيسميكالىق قاۋپى كۇشتى ايماقتار - قازاقستاننىڭ شىعىسى، وڭتۇستىك- شىعىسى جانە وڭتۇستىگى. سەيسمولوگيا ينستيتۋتىنىڭ ديرەكتورى قازاقستاندا جاقىن كەلەشەكتەگى جەر سىلكىنىستەرىن بولجاۋ قيىن، ال ۇزاق مەرزىمدى بولجامدار جاساۋدا وتاندىق ماماندار قىتايمەن بەلسەندى ىنتىماقتاستىقتا.
