تۇماۋدان ساق بولىڭىز
ۆيرۋستى ينفەكسيا اسقىنىپ كەتسە، سوڭى اۋىر جاعدايعا اكەلىپ سوعۋى مۇمكىن.
سوندىقتان ونىڭ الدىن العان ءجون دەيدى استاناداعى №8 قالالىق ەمحانانىڭ دارىگەرلەرى. اسىرەسە كۇزدە ءورشي تۇسەتىن ءجىتى رەسپيراتورلىق ۆيرۋستىق ينفەكسيالار جەر بەتىندەگى حالىقتىڭ 15 پايىزىنا دەيىن جۇعادى ەكەن.
ءاليا مىرزاعاليەۆا ەگىز قىزى ارۋجان مەن اياجاندى كەزەكتى تەكسەرۋدەن وتكىزۋگە الىپ كەلىپتى. دارىگەرلەردىڭ اقىل-كەڭەسىنە كوبىرەك قۇلاق اساتىن كەلىنشەك تۇماۋعا قارسى ۋاقتىلى ەم الىپ وتىرادى.
«سونىڭ ارقاسىندا قىزدارىم قىستا ساباق كەستەسىنەن قالىپ، نە توسەك تارتىپ جاتقان ەمەس. ءوزىمىز دە دەر كەزىندە ەكپە سالدىردىق. جالپى تۇماۋعا جەڭىل قاراۋعا بولمايدى»، - دەيدى ول.
ءاليا مىرزاعاليەۆا، قالا تۇرعىنى:
- كەزەكتى اۋرۋ رەتىندە قابىلدامايمىز. جاي سول باس نە ءىش اۋرۋى دەپ قارايمىز. ال نەگىزىندە ونىڭ سالدارى كوپ. اۋىر زاردابى بولماس ءۇشىن، كەلەشەكتە بالالاردىڭ دەنساۋلىعىنا كۇش تۇسىرمەۋ ءۇشىن دەر كەزىندە قارالىپ، تەكسەرۋدەن ءوتىپ تۇرعان دۇرىس.
20 جىلدان استام مەديتسينا سالاسىندا ەڭبەك ەتىپ كەلە جاتقان گۇلميرا دۇيسەنبيەۆا ءجىتى رەسپيراتورلىق ۆيرۋستىق ينفەكتسياعا شالدىققان جاعدايدا ءوز بەتىنشە ەم قابىلداۋعا بولمايتىنىن ەسكەرتەدى. ويتكەنى اسقىنعان دەرتتىڭ قايتۋى قيىن. زالالى دا بولۋى مۇمكىن. سوندىقتان دارىگەر كەڭەسىن العان ءجون دەيدى. ويتكەنى ەكپەنىڭ قىزۋى كوتەرىلىپ، تۇماۋ بەلگىلەرى بايقالعان ادامدارعا اسەرى بولمايدى.
گۇلميرا دۇيسەنبايەۆا، №8 قالالىق ەمحانانىڭ دارىگەرى:
- ينفليۋۆان، ۆاكسيگريپ العان ادامدار ولار قىستىڭ كۇنى تۇماۋمەن اۋىرمايدى دەپ ايتا المايمىز. اۋرۋ ءارتۇرلى بولادى، ول ادامنىڭ دا يممۋنيتەتىنە، تابيعاتىنا دا بايلانىستى. بىرەۋلەر اۋىرماۋى مۇمكىن. بىرەۋلەر جەڭىل دارەجەدە وتەدى. ەندى بىرەۋلەرى قىس بويى تۇماۋ بولماي وتەدى. ءبىر عانا ەمحانادا 76 مىڭنان استام ادام تىركەۋگە الىنعان. ونىڭ 15 مىڭعا جۋىعى - بالالار. كۇنى بۇگىنگە دەيىن 200 دەن استام بالاعا تۇماۋعا قارسى ەكپە جاسالىپتى.
كوپشىلىكپەن كۇندەلىكتى تىعىز جۇمىس جاسايتىن 139 مەديتسينا قىزمەتكەرلەرى مەن 12 جۇكتى ايەلگە ۆاكسينا سالىنعان. جالپى تۇماۋعا قارسى 1300 دانا ەكپە تەگىن ءبولىنىپتى. «بۇل دارىلەر اسا قاۋىپتى ۆيرۋسپەن كۇرەسۋگە قاۋقارلى»، - دەيدى دارىگەرلەر.
24.kz
