ارال تەڭىزى ايماعىنداعى ەكولوگيالىق اپات سالدارى ارتىپ كەلەدى

كونفەرەنتسياعا قازاقستاندىق دەلەگاتسيانى ق ر اۋىل شارۋاشىلىعى ۆيتسە-ءمينيسترى ەرلان نىسانبايەۆ باستاپ بارادى.

كونفەرەنتسيا ماقساتى - ارال تەڭىزى ماسەلەسىنە حالىقارالىق قاۋىمداستىقتىڭ نازارىن اۋدارتىپ، ايماقتىق تابيعاتتى ساقتاۋ جۇمىستارىنا، الەۋمەتتىك- ەكونوميكالىق جانە سۋ شارۋاشىلىعى جوبالارىنا تىڭ سەرپىن بەرۋ.

جيىنعا «ارالدى قۇتقارۋ» حالىقارالىق قورىنا مۇشە مەملەكەتتەر وكىلدەرى، ب ۇ ۇ اگەنتتىكتەرى، تاعى باسقا دا ءبىرقاتار حالىقارالىق بانك پەن ۇيىمدار قاتىسادى دەپ جوسپارلانىپ وتىر.

بۇگىندە تەڭىز ورنىندا اۋماعى 5,5 ميلليون گەكتار بولاتىن قۇم مەن تۇز ارالاسقان ءشول پايدا بولعان. جىل سايىن قۇرعاپ جاتقان تەڭىزدەن اۋاعا 75 ميلليون توننادان استام شاڭ مەن ۋلى، تۇزدى توزاڭ كوتەرىلەدى.

سۋدىڭ لاستانۋى، تۇز بەن شاڭنىڭ اۋاعا ارالاسۋى ادامدار اراسىندا ءتۇرلى اۋرۋدى قوزدىرىپ وتىر. ايماقتا وسىمدىك جانە جانۋارلار الەمىنىڭ: ناقتىراق ايتقاندا، بالىقتىڭ 11 ءتۇرى، سۇتقورەكتىلەردىڭ 12، قۇستاردىڭ 26، وسىمدىكتەردىڭ 11 ءتۇرى جويىلىپ كەتتى.

مامانداردىڭ ەسەپتەۋىنشە، سوڭعى 50  جىلدا ارالعا قۇياتىن وزەندەردىڭ سۋى شامامەن 4,5 ەسە ازايعان. سۋ دەڭگەيىنىڭ اۋماعى 8 ەسە، سۋ ماسساسىنىڭ كولەمى 13 ەسەگە كەمىپ، ايماقتىڭ تۇزدانۋ دەڭگەيى 13-25 ەسە كوبەيگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى