بۇگىن مىسىردا قارالى كۇن جاريالاندى
بۇل تۋرالى جارلىقتى مىسىر پرەزيدەنتى ابدەل فاتتاح اس-سيسي شىعاردى.
قازىرگى ۋاقىتتا قۇربان بولعانداردىڭ جالپى سانى 33 ادامعا جەتتى.
25 ادام ءال-اريش قالاسىنىڭ ماڭىنداعى باقىلاۋ- وتكىزۋ بەكەتىندە جۇما كۇندىز بولعان تەراكتى كەزىندە قازا بولدى. ءوزىن-ءوزى جارعان لاڭكەس جارىلعىش زاتتار تولتىرىلعان اۆتوكولىكپەن اتالمىش پۋنكتكە شابۋىل جاساعان.
قازا بولعانداردىڭ اراسىندا اسكەريلەردەن وزگە، قاراپايىم ازاماتتار دا بار. جارالانعاندار سانى بىرنەشە ونداعان ادامعا جەتتى. بەسەۋى گوسپيتالدا قازا بولدى.
ال ارادا بىرنەشە ساعات وتكەننەن كەيىن ءدال وسى قالاداعى كەلەسى باقىلاۋ-وتكىزۋ پۋنكتىنە قارۋمەن وق جاۋدىرىلعان. بۇل وقيعا ورنىندا ءۇش سارباز اجال قۇشتى، دەپ حابارلايدى ريا نوۆوستي.
