بۇگىن مۇسىلمانداردىڭ قاسيەتتى اي - مۇحاررام ايى باستالدى
مۇحاررام دەگەن ءسوز «قاسيەتتى»، «تىيىم سالىنعان» دەگەن ماعىنالاردى بىلدىرەدى.
بۇل - قۇراندا ايتىلعان قاسيەتتى ايلاردىڭ ءبىرى.
مۇحاممەد مۇستافانىڭ (اللانىڭ سالەمى مەن يگىلىگى جاۋسىن!) جانە ساحابالارىنىڭ مەككە شاھارىنان ءمادينا قالاسىنا قونىس اۋدارعان ساتىنەن باستاۋ الادى.
مۇسىلمانشا كۇنتىزبەدەگى العاشقى اي بولىپ سانالاتىن مۇحاررام ايى سوعىس پەن جاۋلاسۋعا تىيىم سالىنعان ءتورت ايدىڭ ءبىرى بولىپ تابىلادى. مۇحاررام ايىنىڭ ءمانى مەن ماڭىزى قاسيەتتى قۇران مەن حاديستەردە ايتىلعان. سول سەبەپتى، ءار مۇسىلمان بۇل ايدا جاراتقان يەگە بارىنشا جاقىنداپ، رازىلىعىن الۋ ءۇشىن كوپ قۇلشىلىق ەتۋى ءتيىس. يمام عازالي «يحيا» دەپ اتالاتىن ەڭبەگىندە مۇحاررام ايىن عيباداتپەن وتكىزگەن ادامنىڭ جىل بويى بەرەكەگە كەنەلەتىنىن جازىپ كەتكەن.
مۇسليمنەن جەتكەن ساحيح حاديستە بىلاي ايتىلعان: «رامازاننان كەيىن ەڭ قۇندى ورازا مۋحاررام ايىندا تۇتىلعان ورازا بولىپ تابىلادى». تابارانيدەن جەتكەن وزگە حاديستە: «مۇحاررام ايىندا ءبىر كۇن ورازا ۇستاعان جان 30 كۇن ورازا تۇتقانداي ساۋاپ الادى» دەپ ايتىلعان. ال، تاعى ءبىر حاديستە مۇحاررام ايىنىڭ بەيسەنبى، جۇما جانە جەكسەنبى كۇندەرى ورازا ۇستاعان ادامنىڭ دارەجەسى كوتەرىلىپ، مول ساۋاپقا كەنەلەتىنى ءسوز بولعان.
