يپوتەكاسىن تولەي الماعان ايەلدەر قۇرساعىن جالعا بەرۋگە ءماجبۇر
بالا سۇيەم دەيتىندەر ەندى 25000 ا ق ش دوللارىن تولەسە بولدى، دەنى ساۋ بالانى دۇنيەگە اكەلۋگە ءازىر.
تىپتەن، قۇرساعىن جالعا بەرەتىندەر جاسى مەن كەلبەتىنە قاراي سابيگە دەگەن باعانى ارتتىراتىن كورىنەدى.
بالا ءسۇيۋ بىرەۋگە مۇڭ بولسا، بىرەۋگە تابىس كوزى. سۋرروگات انالار قازىر سۇرانىستا. قىزمەتىن ساۋداعا سالعان ولار تالاپتارىن عالامتور بەتىنە جاريالاپ، تەلەفون نومىرلەرىن دە ەش قىسىلماستان بادىرايىپ كورسەتكەن. ءبىز حابارلاسقان انالاردىڭ بارلىعى جۇمىسسىز، نەسيەسى شاش ەتەكتەن. كەزدەسۋگە كەلىسكەن كەلىنشەكتەن وزگە قۇرساق ارقىلى بالالى بولۋدىڭ قۇپياسىن ءبىلىپ قايتتىق.
«نەسيەگە پاتەر العانبىز. تولەي الماي جاتقان جاعدايىم بار. بۇل مەنىڭ ەكىنشى رەت بالا كوتەرۋىم. بىرىنشىسىندە وسىلاي اقشاعا كوتەرىپ بەردىم. بالا كوتەرگەن سوڭ اي سايىن جاردەماقى تولەيسىز، بارلىعىن زاڭدى تۇردە كەلىسىم شارتپەن جاسايمىز»، - دەدى سۋرروگات انا.
قۇرساعىن جالعا بەرۋشىلەردىڭ بولاشاق اتا-اناعا قوياتىن تالاپتارى بىردەي. ءبىراق، جاسى مەن بەت الپەتىنە قاراي باعاسىندا ءسال ايىرماشىلىق بار. ياعني، بويى ۇزىن، كەلبەتتى كەلىنشەكتەردىڭ قۇنى قىمباتىراق. جالپى بالا ءسۇيۋ باقىتى ءۇشىن ءار اتا-انانىڭ قالتاسىنان 40 مىڭ دوللارعا جۋىق قارجى كەتەدى ەكەن. ونىڭ ىشىنە سۋرروگات انانى جانە بالانى مەديتسينالىق تەكسەرۋدەن وتكىزۋ، ۇرىق ەنگىزۋ، بالانى 9 اي كوتەرگەنى ءۇشىن اقى جانە بوسانۋعا كەتكەن قىزمەت كىرەدى.
«مەن جالپى 25000 ا ق ش دوللارىن سۇراپ ءجۇرمىن. سونداي-اق بوسانعانعا دەيىن مەن جۇمىس جاساي الماي ۇيدە وتىرامىن. سوعان اي سايىن 100 مىڭ تەڭگەدەن بەرىپ تۇرساڭىز. توتەنشە جاعداي بولىپ، ەمحاناعا جاتىپ قالسام دا، اقىسىن ءسىز تولەيسىز»، - دەدى سۋرروگات انا.
مامانداردىڭ سوزىنە سۇيەنسەك قازاقستانداعى ءاربىر بەسىنشى وتباسى جورگەك يىسىنە ءزارۋ ەكەن. جىل سايىن 500 گە جۋىق اناعا جاساندى جولمەن ۇرىقتانۋعا مەملەكەت تاراپىنان قارجى بولىنسە دە، نارەستە سۇيە الماعان شاڭىراقتىڭ سانى ازايار ەمەس. ال، اق حالاتتىلار بولسا، «بۇل ماسەلەمەن كۇرەسۋدىڭ باستى جولى كۆوتا سانىن ارتىرىپ، بولىنەتىن قارجى كولەمىن كوبەيتۋ»، - دەيدى.
ستاتيستيكاگا سۇيەنسەك، ورتا ەسەپپەن ەلىمىزدەگى ەرلى- زايىپتىلاردىڭ ون بەس پايىزى بەدەۋلىككە ۇشىراعان. وسىعان وراي، ولار قۇرساعىن جالعا بەرەتىن انالاردىڭ قىزمەتىنە جۇگىنۋگە ءماجبۇر. ال، سوڭعى 5 جىلدىڭ ىشىندە قازاق دالاسىندا 260 انا زاڭدى تۇردە سۋرروگاتتىق جولمەن نارەستەلى بولىپ، اقىسىن العان.
almaty.tv
